WhakamĀrama Āpitihanga
Koia nei ētahi whakamahinga o te kupu nei, te mōtika:
- Ko te mōtika tangata. Hei tauira, ko te mōtika oranga, ko te mōtika herekore, ko te mōtika ki te whai i te hāhi e hiahiatia ana, ko te manawhiri kōrero, ko te mōtika kia kore rawa e whakahāweatia i runga i te mātāwaka, i te tae o te kiri, i te tuakiri ā-ira, i te aronga hōkaka, i tētahi atu āhuatanga tangata rānei.
- Ko te mōtika wahine. Koia rā ngā mōtika e manarite ai te wahine ki roto i ngā āhuatanga katoa o te hapori e noho nei ia.
- Ko te mōtika tamariki. Hei tauira, ko ngā mōtika kia manaakitia te tamaiti, kia arohatia, kia haumaru tana noho ki tōna whānau, kia whakaakona ia ki te mātauranga e whai oranga ai ia, oranga wairua, oranga hinengaro, oranga pāpori, oranga tinana.
- Ko te mōtika iwi taketake. Koia ko te mana ki tōna tino rangatiratanga, ki tōna reo, ki tōna mātauranga, ki ōna whenua, otirā kia pūmau tonu tōna ahurea. Ka ara ake ngā mōtika iwi taketake i runga i te whakakāinga tuatahitia e taua iwi te whenua e noho nei ia, me te pūmau tonu o te ahikā i te takanga o ngā tau maha. Nō te tau 2007 i whakapūmautia ai e Te Rūnanga Whakakotahi i ngā Iwi o te Ao tā rātou kaupapa e tiakina ai ngā mōtika iwi taketake huri i te ao, ka kīia ko Te Whakapuakitanga Tukipū o ngā Mōtika Iwi Taketake.
- Ko te mōtika whenua. Koia ko te mana o te iwi taketake ki ō rātou whenua tuku iho. I ngā whenua maha puta noa i te ao, e pakanga tonu ana ngā iwi taketake kia mau tonu i a rātou, kia whakahokia rānei ki a rātou ō rātou mōtika whenua.
- Ko te mōtika kaimahi. Ka whai wāhi atu i konei ko te mōtika kia tōkeke te utu i te kaimahi, kia pai hoki te haumaru taiao o tōna wāhi mahi.
- Ko te mōtika kiritaki. E hāngai ana ēnei mōtika ki ngā utauta me ngā ratonga ka hokona e te tangata. Hei tauira, kia mārama ia ki te mea e hokona ana me ngā here katoa, kia tōkeke te utu, kia haumaru hoki te mea e hokona ana.
- Ko te mana whakairo hinengaro. Koia ko te mōtika o te tangata ki ngā hua taketake ka titoa, ka tāraitia, ka whakaputaina e ia, pērā i te toi ataata, i te puoro, i te tuhinga kōrero, i te whakaari, i te kiriata me te pūmanawa rorohiko.
Haere tahi ai ngā mōtika o te tangata me ōna haepapa. Koia ko ngā mahi e tika ana hei kawe māna, mā reira e riro ai i a ia ōna mōtika. Hei tauira, i te nuinga o ngā whānau he haepapa ō ngā tamariki ki te āwhina i ngā mahi o te whānau, pērā i te tiki wahie me te horoi rīhi. I te porihanga, he haepapa ō te tangata ki te whai i ngā ture me ngā tikanga kua whakatakotoria mō ngā wāhi tūmatanui.
Nō te tau 1948 i mana ai Te Whakapuakitanga Tukipū o ngā Mōtika Tangata o Te Rūnanga Whakakotahi i ngā Iwi o te Ao. He tauākī tēnei e whakatairanga ana i ngā mōtika tukipū me ngā mōtika unukore o ngā tāngata katoa o te ao, waihoki ka kīia he mōtika wāhikore, e kore e taea te wāwāhi. Nō te tau 1977 i whakatūria ai Te Kāhui Tika Tangata o Aotearoa, ko rātou hei whakatairanga, hei tiaki i te mana me ngā mōtika o ngā tāngata katoa o Aotearoa.
