E kore e mutu ngā mihi ki a koutou, te hunga i āwhina i te mahi rangahau, i te tuhituhi, i te haehae me te whakaputa i a Paekupu, he papakupu e aro ana ki ngā wāhanga ako o roto i Te Marautanga o Aotearoa. Tēnā koutou kei ngā pouako o roto i ō tātou kura reo Māori puta noa i te motu, e whakapau nei i ō koutou kaha ki te whakatairanga i tō tātou reo i roto i ngā kaupapa ako katoa o te kura.
E ngā Kāhui Whakaruru, e ngā mātanga o reo, e ngā mātanga o ngā wāhanga ako o te marautanga, e mihi ana i runga i te ngākau iti mō koutou i ārahi mai, i manaaki mai i tēnei kaupapa a tātou. Mei kore ake koutou hei papa whakawhitiwhiti kōrero, hei kanohi tirotiro, hei rōpū whakatikatika, hei whakatau anō i ngā tautohe ko ēhea rā ngā kupu hei whakauru ki tā tātou papakupu, hei kawe i ngā kaupapa maha o roto i ngā wāhanga ako o te marautanga.
Ko te tūmanako ia, he paku āwhina tēnei rauemi hei hāpai i ngā mahi whakaako, e eke panuku ai ā tātou tamariki i ēnei wāhanga ako whakahirahira, e rangatira hoki ai tō tātou reo.
Tēnā koutou katoa.