WhakamĀrama Āpitihanga
Koia nei ētahi momo pakanga e whai wāhi atu ai he rākau a Tū:
- Ko te pakanga whenua. He pakanga tēnei kia riro i tētahi rōpū ngā whenua me te rangatiratanga o tētahi.
- Ko te kaiākiri. Ko te pakanga a tētahi rōpū ki tētahi i roto tonu i te whenua kotahi.
- Ko te riri tara ā-whare. Ko te pakanga a tētahi rōpū ki tētahi o roto tonu i te iwi kotahi, i te hapū kotahi rānei.
- Ko te pakanga ā-ao. Koia ko ngā pakanga nui e uru atu ai ngā whenua maha o te ao me ō rātou iwi.
He maha ngā take ka pupū ake te pakanga a tētahi iwi ki tētahi, a tētahi rōpū rānei ki tētahi. Koia nei ētahi:
Arā atu anō ngā horopaki e whakamahia ai te kupu nei, te pakanga, engari kāore e hīkina he rākau a Tū. Hei tauira:
- Ko te pakanga taungaungau. He tao kupu, he kupu whakaiti ka whiua ki waenganui i ētahi whenua e rua, e kainamu atu ana ki te pakūtanga o te riri.
- Ko te pakanga tauhokohoko. He pakanga ohaoha ka ara ake i runga te ārai atu a tētahi whenua i ngā mahi tauhokohoko a ngā pakihi o whenua kē.
- Ko te pakanga kia whakahorohorotia tētahi mahi kino, pērā i te whakatuatea, i te tūkino tamariki, i te kaikiri me te whakahāweatanga.
- Ko te pakanga kia ātetengia tētahi ture hou a te kāwanatanga, pērā i Te Ture Takutai Moana i Aotearoa i te tau 2004.
- Ko te pakanga i tētahi take, pērā i te pakanga kia ora anō ai te reo Māori.
Ko te taututetute tētahi kupu whānui mō ngā momo pakanga, ngā momo raruraru, whakatete rānei ka hua ake ki waenganui i te tangata, i te rōpū rānei.
Koia nei ētahi o ngā pakanga matua o tāwāhi i tukuna e Aotearoa he hōia hei ope whawhai, hei ope hohou rongo rānei:
- Ko Te Pakanga Poa i Āwherika ki te Tonga, mai i te tau 1899 ki te 1902. He pakanga tēnei i waenga i ngā rōpū tātāmi e rua o Piritana Nui me Hōrana (ngā Poa).
- Ko Te Pakanga Tuatahi o te Ao, mai i te 1914 ki te 1918. He pakanga i Ūropi me ētahi wāhi o te Rāwhiti Waenga. Ka whawhai a Piritana Nui me ōna hoa whenua nei a Rūhia, a Amerika, a Wīwī me ētahi atu ki a Tiamana me ōna hoa whenua, a Ataria, a Purukāria, me ētahi atu.
- Ko Te Pakanga Tuarua o te Ao, ka tīmata i Ūropi i te 1939 o ngā tau, ka horapa ki Āwherika ki te Raki, ki Te Moana-nui-a-Kiwa, ā, ka mutu i te 1945. Ka pakanga anō a Piritana Nui me ōna hoa whenua ki a Tiamana me ōna hoa.
- Ko Te Pakanga ki Kōrea i ngā tau 1950 ki te 1953. He pakanga ki waenganui i te kāwanatanga angatōpū o Kōrea ki te Raki me te kāwanatanga angahaorawa o Kōrea ki te Tonga. Ka tautokohia ēnei whenua e rua e ō rāua hoa whenua, ko Aotearoa i te taha o Amerika me Ahitereiria hei tautoko i a Kōrea ki te Tonga.
- Ko Te Pakanga ki Mareia, mai i te 1948 ki te 1960. He pakanga ka pupū ake i waenganui i te rōpū angatōpū o reira me te kāwanatanga tātāmi o Ingarangi e whakahaere ana i te whenua i taua wā.
- Ko Te Pakanga ki Whitināmu mai i te tau 1954 ki te 1975. He pakanga i pahū ake i runga i te mataku o Amerika ki te tū kaha o ngā whenua angatōpū i Āhia ki te Pitonga, pērā i a Whitināmu.
- Ko Te Pakanga ki Awhekenetāna, mai i te tau 2001 ki te 2019. He hoa āwhina a Aotearoa i a Amerika e whawhai ana ki ngā rōpū whakatuatea o Awhekenetāna. I ngā tau tōmuri o te pakanga ka noho atu ngā hōia o Aotearoa hei ope hohou rongo ki reira.