WhakamĀrama Āpitihanga
He kaupeka kei ētahi hāhi, ka kīia he tānga hāhi. He ōrite ngā whakapono me ngā mātāpono matua o ia tānga o tētahi hāhi, engari he rerekē pea ngā tikanga whakahaere, ngā momo huihui me ngā karakia. Ko te Mihinare, ko te Wēteriana, ko te Perehipitīriana, ko te Katorika hei tauira o ētahi tānga hāhi Karaitiana. E 500 tau ki muri ka wehea te hāhi Karaitiana ki ētahi wehenga e rua, ka kīia ko te Porotehana me te Katorika. Ka whai ngā tānga hāhi Porotehana i ētahi whakahoutanga kia puta ki waho i ngā tikanga pēhi a te hāhi Karaitiana i taua wā rā. Ka puta i reira ngā hāhi Porotehana e mōhiotia ana i ēnei wā, arā, ko te Mihinare, ko te Perehipitīriana, ko te Wēteriana ētahi.
Ko te manawhiri hāhi tētahi mōtika tangata tūāpapa, arā, ko te noho wātea o te tangata ki te whai i te hāhi me ngā whakapono ka hiahiatia e ia, me te kore noa o te aro, o te whiu rānei a te kāwanatanga me āna ture.
Mēnā e taikaha ana te ū o tētahi kaupeka hāhi ki ō rātou whakapono, ki ngā ture, ki ngā tuhinga tūāpapa me ngā karaipiture, ka kīia tērā ko te angawhakapū. Ahakoa te hāhi, he Karaitiana, he Ihirama, he Hinerū, he Hūrae, he Pūtimi, he aha kē rānei, he kaupeka angawhakapū ō rātou.
Ko te hāhi puri tikanga, koia te hāhi e kaha pupuri ana ki ngā tikanga me ngā whakahaere tuku iho a te hāhi, pērā i tā te Hūrae puri tikanga tino whai i ngā mahi e tohua ana mō tō rātou Rātapu, te āta mau ki ā rātou kai tūturu, me te ako anō i ngā kōrero o roto i te Ture.
Kei ia hāhi ā rātou ake pukapuka e kawe nei i te rongopai, i ngā karakia, i ngā kōrero tuku iho, i ngā tikanga a tēnā me tēnā. Koia nei ētahi e mōhiotia whānuitia ana:
Kei ia hāhi anō āna ake taiopenga, āna ake tikanga hei whakanui i ōna atua, hei whakanui rānei i tētahi āhuatanga o te hāhi. Koia nei ētahi:
- I te hāhi Karaitiana: ko te Aranga, te wā i mate ai, i ara anō ai a Ihu Karaiti; ko te Kirihimete, te rā whānau o Ihu Karaiti; ko te Rēneti he wā nohopuku, he wā huritao i mua i ngā whakanui o te Aranga.
- I te hāhi Muhirama: ko te Ramatana, he marama tapu, he wā nohopuku, he wā huritao, he wā nui mō te tuku karakia.
- I te hāhi Hinerū: ko te Tiwāri, he taiopenga whakanui i te hauhakenga kai, i te tau kua hori me te tau kei mua i te aroaro, tae atu ki te toanga o te pai ki runga ake i te kino. Ka kīia hoki te Tiwāri he Taiopenga Rama.