hākinakina

WhakamĀrama Āpitihanga

He taha whakawhanaunga tō te hākinakina, inā e pāhekoheko ana ngā kaitākaro o roto i tētahi kapa, e pāhekoheko ana hoki ki te hoariri. He nui ngā akoranga mā te tangata i tana whai wāhitanga atu ki te hākinakina, pērā i te manawanui, i te mahi tahi, i te māia, i te whakatakoto whāinga, i te taki kare ā-roto, me te maha noa atu.

Ko te taha tauwhāinga hoki tērā o te hākinakina, arā, ko te whakatipu i te wairua whakataetae me te ū anō ki te whanonga tapatahi. Ko te whāinga matua o roto i te hākinakina kia toa koe, tō kapa rānei, kia hinga te hoariri.

Koia nei ētahi wehewehenga o ngā momo hākinakina:

• Ko ngā tākaro tuku iho. Koia ko ngā kēmu, ko ngā tākaro a ngā tīpuna i te wā i a rātou, pērā i te kī-o-rahi, e tākaro tonuhia ana i ēnei rā nei. Ka kīia hoki ēnei he tākaro Māori.
• Ko ngā hākina kiritahi, arā, ko ngā hākinakina ka tauwhāingatia e te tangata i tōna kotahi. Ka tauwhāinga atu ia ki tangata kē, ka kīia ia ko te hoariri. Hei tauira, ko te hahaupōro, ko te mekemeke, ko te kaiaka.
• Ko ngā hākina ā-kapa, arā, ka tauwhāinga tētahi kapa ki tētahi. Ka kīia ngā kapa e tauwhāinga ana, he hoariri. Hei tauira, ko te poitarawhiti, ko te poirewa, ko te whutupōro.
• Ko ngā hākina wai, pērā i te waka ama, i te kauhoe me te waka kōmaru.
• Ko ngā hākina pōro. I tēnei momo, ka whanaia, ka makaia, ka whiua, ka hāua rānei he pōro. Hei tauira, ko te poitūkohu, ko te poiuka me te poipātū.
• Ko ngā hākina rākete, arā, ka hāua, ka patua rānei te pōro ki tētahi rākete. Hei tauira, ko te tēnehi, ko te pūkura me te poipātū.
• Ko ngā hākina taumātakitahi, pērā i te mekemeke, i te mamau me te ruturau.
• Ko ngā momo hākina-rau, pērā i te hākinatoru - inā ko te kauhoe, ko te eke pahikara, ko te omaoma te tōpūtanga o ngā hākinakina i te tauwhāinga kotahi.
• Ko te kaiaka me ōna hākinakina maha hei whakamātau i te mārohirohi, i te tere, i te matatū me te manawa piharau o te tangata. Ko te kōpere, ko te omaroa, ko ngā momo peke, ko ngā momo maka ētahi o roto i te kaiaka.
• Ko te hākina pūkaha, arā, ko ngā momo tauwhāinga taraiwa waka e whai pūkaha ana, pērā i te motukā me te motupaika.

He ture tō ia hākinakina hei whāinga mā ngā kaitākaro, ā, i te nuinga mā tētahi kaiwawao e āta tirotiro te ū o ngā kaitākaro ki ngā ture, māna anō e whakatau me aha ina hara tētahi kaitākaro, ina hē rānei tana mahi ki tā ngā ture e tohu ai.