WhakamĀrama Āpitihanga
Tokowhitu ngā kaitākaro o ia kapa kī-o-rahi, ka tohua tētahi ko ngā kīoma, ko tētahi ko ngā taniwha, ā, ka hohoko ēnei tūmahi a ngā kapa i te wā haurua, i te wā hauwhā rānei.
He porowhita te āhua o te papa tākaro, e toru ōna rohe, ka whakatūria he pou ki te pokapū, koia hei keo, ka kīia ko te tupu. E whitu hoki ngā pou, ngā koeko rānei ka whakatūria i te rohe o Te Ao. I tua atu i te tupu me ngā pou, ko te kī tētahi atu utauta ka hiahiatia. He momo poi iti te kī, he māmā te pupuri ki te ringa kotahi:
Ko tā ngā kīoma hei tīmata i te kēmu, he maka, he whana rānei i te kī i te rohe o Te Marama, hei hopu mā tētahi hoakapa i te rohe o Te Pawero. Ka makaia te kī ki waenganui i ngā kīoma, ka oma rānei te kaikawe kī. Ko te whāinga kia whakapā atu te kī ki tētahi pou i te rohe o Te Ao, mā reira e piro ai. Engari kāore aua piro e tatauria, āpānoa kia whakatauria te kī ki te papa i te rohe o Te Pawero. Tokorua ngā kīoma ki te rohe o Te Pawero, ko tā rāua mahi he tiaki i te tupu, arā, he aukati i te kī ka whiua e ngā taniwha. Tokorima ngā kīoma ki te rohe o Te Ao. Ka whakaaetia ngā kīoma ki te rohe o Te Roto mēnā e kawe ana i te kī, ā, e whai ana kia whakatakotoria te kī ki te papa i Te Pawero. Kāore e whakaaetia te hoki whakamuri ki te rohe o Te Ao. Mēnā ka rutua, ka whakapāngia, ka kōwhakina rānei te kihukihu o te kīoma, ka tukuna te kī ki ngā taniwha, ā, ka kore e tatauria ā rātou piro.
Ko tā ngā taniwha, he whai ki te whānako i te kī i te wā e makaia ana ki waenganui i ngā kīoma, he rutu, he whakapā, he kōwhaki rānei i ngā kihukihu o te kīoma e kawe ana i te kī. Ina tutuki ka riro i ngā taniwha te kī. Mā te whiu i te kī kia pā atu ki te tupu e piro ai ngā taniwha. Kāore e whakaaetia kia nui ake i te rima ngā taniwha ki te rohe o Te Roto, kāore e whakaaetia ki Te Pawero, hāunga te whiupeke mai i Te Roto, engari me whiu te kī i mua i te taunga o te waewae ki Te Pawero. Kāore e herea ana te maha o ngā taniwha ki te rohe o Te Ao.
Ko te kī-o-rahi tētahi o ngā tākaro poi maha a ngā tīpuna, i mutu te tākarohia o te nuinga i te wā o te tāmitanga. Nō nā tata nei kua whakaarangia ake ētahi hei tākaro mā te hunga whai i te kaupapa Māori.