WhakamĀrama Āpitihanga
Ko te ara whakatata, mai i te wāhi o te hahau tuatahi ki te rua, ka kīia he raorao. Ka āta tiakina te pātītī o te raorao, kia poto, kia pai ai te pīrori o te pōro, kia māmā ai te hahau. Kei ngā taha o te raorao te ururua, kei ētahi wāhi o te raorao he whakatara hei whakauaua i te hahaunga o te pōro ki te rua. Hei tauira tēnei o tētahi raorao:
Ka tuhia ki tētahi kāri te maha o ngā hahaunga a ia kaitākaro, e uru ai te pōro ki ia rua, ka kīia tērā he kāri tapeke. Ka tohua hoki ki te kāri te maha o ngā hahaunga e taea ai e tētahi ringa rehe te pōro te hahau ki roto i ia rua. Ka kīia tērā ko 'tā te kāri i tohu ai' mō taua rua. Koia nei ētahi kīanga mō te maha o ngā hahaunga:
- Mēnā kotahi hahaunga ki raro i tā te kāri i tohu ai te tapeke, ka kīia he teo.
- Mēnā e rua hahaunga ki raro i tā te kāri i tohu ai, ka kīia he kārearea.
- Mēnā kotahi hahaunga ki runga ake i tā te kāri i tohu ai, ka kīia he aeha.
- Mēnā e rua hahaunga ki runga ake i tā te kāri i tohu ai, ka kīia he aeharua.
Koia nei ētahi o ngā momo rākau hahaupōro:
- Ko te paorākau hei hahau i te pōro kia rere tawhiti, he taumaha tōna kou. Koia rā te mea ka whakamahia hei hahau tuatahi i te pōro i te āpure tī. Ka kīia hoki he haukuru.
- Ko te paorino hei hahau i te pōro kia piki, kia hārewa ki runga. Ka tauria ngā momo paorino, mai i te 2 ki te 9. Ka whakamahia te paorino 2 mēnā kei te takiwā o te 170 mita te tawhiti. Mēnā kei te takiwā o te 100 mita, ka whakamahia te paorino 9.
- Ko te paokahi hei hahau i te pōro kia poupou te āhua o te piki ki runga me te heke anō ki raro.
- Ko te tīpao hei hahau iti i te pōro ki runga i te papa tīpao, kia uru atu ki roto i te rua.
Ka whai tohurehe te hunga e tākaro hahaupōro ana mō te rēhia te take. Koia te maha o ngā hahaunga ki runga ake i tā te kāri i tohu ai, e matapaetia ana mō te kaitākaro. Mēnā ko te 70 hahaunga tā te kāri i tohu ai mō tētahi papa hahaupōro, ā, e 90 hahaunga te matapae mō te kaitākaro, ko te 20 tana tohurehe (90 - 70 = 20). Ka whiwhi tohurehe te kaitākaro i runga i te whāinga kia tōkeke te whakataetae ki waenganui i ngā kaitākaro.
Koia nei ētahi atu kupu hahaupōro:
- Ko te kotahi atu. Mēnā kotahi noa iho te hahaunga e uru ai te pōro ki te rua, ka kīia kua kotahi atu.
- Ko te hahau kāpō. Mēnā kāore e kitea ana te rua i te wāhi o te hahaunga, ka kīia he hahau kāpō tērā.
- Ko te haurewa. He hahaunga o te pōro kia hārewa ki runga. Ka whakamahia te paokahi mō tēnei momo, ā, koia rā te momo hahau mēnā kei te mārua onepū te pōro.
- Ko te poikurukuru. He kerepei oneone ka karia pokerehūtia ake i te wā e hāua ana te pōro. He tikanga hahaupōro kia whakahokia te poikurukuru e te kaitākaro nāna i kari ake.
- Ko te kōripi whakaroto. Ka hē te hahaunga, inā he kōpiko te rere whakaroto o te pōro, ā, ka tau pea ki te ururua ki te taha o te raorao.
- Ko te kōripi whakawaho. Ka hē te hahaunga, inā he kōpiko te rere whakawaho o te pōro, ā, ka tau pea ki te ururua.
- Ko te tī. He tia paku ka titia ki te papa i te āpure tī. Ka meatia te pōro ki runga i te tī e pai ai te hahau.