WhakamĀrama Āpitihanga
Hei whakamārama i ētahi hākina wai:
E rua ngā momo hoe waka ka mātua whakataetaetia, ko te hoetahi me te hoerua.
- Ko te hoetahi: Ka noho ngā kaihoe ki roto i te waka, ko ngā tuarā e aro ana ki te ahunga whakamua o te waka. Kotahi te hoe a ia kaihoe, ko tā tētahi ki tētahi taha o te waka, ko tā tētahi ki tētahi taha. Nō reira ka tokorua, ka tokowhā, ka tokowaru rānei ngā kaihoe o te waka. Ka tūhonotia a waenganui o te hoe ki tētahi hanga i te taha o te waka, ka kīia he kaurori hoe. Ka puritia e te kaihoe te kakau o tana hoe, ko te rapa ka meatia ki roto i te wai. Mā te tō whakamuri a te kaihoe e āia whakamua ai te waka:
- Ko te hoerua: Ka noho te kaihoe ki roto i te waka, ko tana tuarā e aro ana ki te ahunga o te waka. E rua ngā hoe a ia kaihoe, tētahi ki ia taha o te waka. Ka whakataetaetia te hoerua takitahi, te hoerua takirua, me te hoerua takiwhā:
He waka whāiti te kōreti, ka āia whakamua mā te hohoko o te hoe ki ia taha. E aro ana te kaihoe ki te ahunga whakamua o te waka. Ko ētahi o ngā hākina hoehoko:
Ko te hoehoko wai marino. He rapa kei ia pito o te hoe, ka puritia a waenganui:
Ko te hoehoko wai kōripo. Ka whāia tēnei hākinakina ki te awa taiheke:
Ko te hoehoko kōpiko. He rapa kei tētahi pito kotahi o te hoe. Ka hohoko te kūmea o te hoe ki tēnā taha, ki tēnā taha o te kōreti. Ka whāia tēnei hākinakina i te wai riporipo, ka hoea te kōreti ki waenganui i ētahi rākau e iri ana i ētahi taura e renarena ana ki runga:
Ko te makapoi rōwai. He hākina ā-kapa, ka makaia te poi ki waenganui i ngā kaitākaro, ko te whāinga kia makaia ki roto i tētahi mātiratira i te pito o te wāhi tākaro: