WhakamĀrama Āpitihanga
E pātata ana ki te 10 mita mai i te pātū mua ki te pātū muri, e 6.4 mita te whānui o te papa tākaro. Kāore e whakaaetia te tupana o te pōro ki runga ake i te paetua mua, i ngā paetua taha me te paetua muri:
Ka tū te kaituku kia kotahi tōna waewae ki roto i te rohetuku, ka tukua te pōro i reira. Ka hāua kia tupana i te pātū mua, ki waenganui i te rārangi tuku me te paetua mua. Ki te kore e haurerea e te hoariri, e tika ana kia tau te pōro ki te papa i muri i te rārangi waenga i te taha tauaro o te papa. Ka hohoko haere te hahau i te pōro, ko ia hahautanga me tupana i te pātū mua, ki waenganui i te pae raro me te paetua mua.
Koia nei ētahi kupu poipātū:
- Ko te taitu. Koia ko te tauparea o te kaitākaro kia kore ai e taea atu e ia te pōro. Ka pīratia te taitu, ā, ina whakaaetia e te kaiwawao ka tākaro anō i taua tūtākaro.
- Ko te hau pātū taha. I konei ka hāua te pōro kia tupana i tētahi o ngā pātū taha i mua i te tupana atu ki te pātū mua.
- Ko te hau rua. Kāore e whakaaetia te hau rua, arā, ka rua ngā whakapānga o te rākete ki te pōro.
- Ko te hautaka. He hahau māmā, he hahaka noa iho te tupana i te papa, e pātata ana ki te pātū mua.
- Ko te taupare. Kāore i taea te hahautanga o te pōro nā te aukati tōkeke-kore a te hoariri.
- Ko te ripa. Koia te wāhi e tūtaki ai te papa me te pātū taha. Mēnā ka tupana te pōro ki te ripa ka uaua tā te hoariri hau whakahoki.
- Ko te pōro hē. Ka rua ngā tupana o te pōro i te papa, ka tupana rānei i te tini.
- Ko te haupiritaha. He uaua te whakahoki i te haupiritaha, inā he tino tata te rere whakarara o te pōro ki tētahi o ngā pātū taha.
- Ko te hau whakahoki. Ko te hahau tuarua o tētahi tūtākaro, arā, te whakahokinga o te tuku.
- Ko te tini. Ko te wāhi ki waenganui i te pae raro me te papa i te pātū mua. Ka uhia tēnei wāhi ki te tini, e rangona ai te tupana o te pōro. Kāore e whakaaetia te tupana o te pōro ki raro iho i te pae raro, arā ki te tini.
- Ko te haurere. Ka hāua te pōro i mua i tana tupana i te papa, i te wā e rere tonu ana.