WhakamĀrama Āpitihanga
Koia nei te rākete me te pūkura:
Hei tauira o te papa tākaro pūkura:
Ko te tuku te hahau tuatahi hei tīmata i te tākaro, he hau tukuraro. Ka tū te kaituku ki te rohetuku, ki muri i te rārangi tuku, ā, ka hāua haurokitia te pūkura kia hārewa ki runga ake i te mātiratira, ki te rohe o te hoariri. Ka hāua e te hoariri hei whakahoki i te pūkura. Ka piro te kaitākaro mēnā ka tau te pūkura ki te papa o te hoariri, mēnā ka tau te hau whakahoki a te hoariri ki waho, mēnā rānei ka hē te hahau a te hoariri.
Koia nei ētahi kupu e hāngai ana ki te pūkura:
- Ko te neke māminga. He nekehanga whakataruna hei māminga i te hoariri, he rauhanga hei whakapōnānā i te hoariri i te wā e tuku ana ia i te pūkura.
- Ko te kawe. Kāore e tika te hahau, ka paku kawea te pūkura i runga i ngā au o te rākete.
- Ko te haukuru. He kaha te hahau i te pūkura kia rere torotika ki runga ake i te mātiratira, kāore e hārewa.
- Ko te hauhonu. Ka hāua te pūkura ki te whaitua muri o te rohe o te hoariri. Mēnā he hau tīkoke ka whai wā te kaitākaro ki te whakarite i a ia mō te hau whakahoki a te hoariri, nō reira he momo hau kaupare tērā. Mēnā ka rere tūpā te pūkura, he hau kōkiri tērā, he uaua te whakahoki.
- Ko te hautaka. Ka āta hāua te pūkura kia tere tana taka kia pātata ki te mātiratira, ā, he uaua tā te hoariri whakahoki.
- Ko te haupere. Mā te tākiri i te kawititanga o te ringa pupuri i te rākete e perea ai te pūkura kia hohoro te rere torotika.
- Ko te hau mātiratira. He pātata ki te mātiratira te haukerea o te pūkura kia hohoro te taka ki te rohe o te hoariri. He uaua te whakahoki.
- Ko te haupana. Ka āta hāua te pūkura, he iti noa iho te tākiri i te kawititanga ringa.
- Ko te taupatupatu. Koia ko ngā hahautanga mai i te tukutanga o te pūkura ki te toanga o tētahi i taua tūtākaro.
- Ko te haukere. He kaha te hau tukurunga i te pūkura kia hohoro te rere whakararo ki te rohe o te hoariri. Koia ko te hau kōkiri matua o roto i te pūkura.