WhakamĀrama Āpitihanga
Koia nei te āhua o te papa tākaro poirewa:
Ko te tuku te tīmatanga o ia tūtākaro, he tukuraro, he tukurunga rānei, arā, ka hāua te pōro mai i muri o te paepito. Mēnā ka tau ki te papa i te weherua o te hoariri, ka piro te kapa tuku, ā, ka kīia tērā tuku, he tuku toa. Mēnā ka haere te pōro ki waho atu i te papa tākaro, ka piro te hoariri. Ko tā te hoariri, he kari i te pōro, arā, ka neke tētahi o ngā kaitākaro kia tau te pōro ki ōna kikowhiti e rua, ki ōna kawititanga ringa rānei, ā, ka āta hāua ake ki tētahi hoakapa. Ko tā te hoakapa, he whakarite i te pōro, arā, he āta pana i te pōro mā ōna matimati, kia hārewa ki runga ake i te mātiratira hei haukuru mā tētahi hoakapa ki te weherua o te hoariri. Ina kaha te haukuru, he uaua te kari ake mā te hoariri. Ko tā ētahi o te hoariri he peke i tō rātou taha o te mātiratira me te tū o ngā ringaringa hei aukati i te pōro. Ka kīia tērā he ārau:
E toru te mōrahi o ngā haunga pōro a te kapa kia whakahokia te pōro ki te hoariri. Ki te kore e tutuki i roto i aua haunga e toru, ka piro te hoariri.
Kāore e whakaaetia te hopu i te pōro, te kawepōro rānei. Kāore hoki e whakaaetia te pā o te ringa ki te mātiratira.
Ina piro tētahi kapa i te tuku a te hoariri, ka riro i taua kapa rā te tuku. I te rirohanga o te tuku ka huri ngā kaitākaro o te kapa tuku, arā, ka puta tētahi ki te pae whakahiri, ā, ka uru mai tētahi o ngā whakahiri. Ka neke ia kaitākaro ki te taha ki wāhi kē i te papa tākaro. Ka kīia tēnei he huringa.