WhakamĀrama Āpitihanga
Hei whakaahua i te papa tākaro poitarawhiti me ōna wāhanga:
E whitu ngā tūranga o roto i te kapa poitarawhiti. Ka whakamaua he pari tūranga ki ia kaitākaro kia kitea ai tōna tūranga e te kaiwawao, e te hunga mātakitaki anō hoki:
- Ko te kaiārai ūhanga (GK). E whakaaetia ana ia ki te rohe ūhanga kaupare o te papa me tōna porohita ūhanga. Ko tāna he āpititū i te kaikuru ūhanga o te hoariri, arā, he haukoti i te pōro ka makaia ki a ia, he whakararu i tana kuru ūhanga. Mēnā ka puta te pōro ki waho o te paepito, mā te kaiārai ūhanga e maka te pōro ki tētahi o ana hoakapa hei tīmata anō i te kēmu.
- Ko te kaipare ūhanga (GD). E whakaaetia ana ia ki te rohe waenga, te rohe ūhanga kaupare me tōna porohita ūhanga. Ko tāna, he āpititū i te tākaro a te kaikōkiri ūhanga o te hoariri, he āwhina i te makanga o te pōro mai i te rohe ūhanga kaupare ki te kaikuru o tōna kapa i te pito kōkiri o te papa tākaro.
- Ko te kaipare paihau (WD). E whakaaetia ana ki te rohe waenga me te rohe ūhanga kaupare, engari kaua te porohita ūhanga. Ko tana mahi matua, he āpititū, he kaupare i te tākaro a te kaikōkiri paihau o te hoariri, he āwhina i te makanga o te pōro ki roto i te pito kōkiri o te papa tākaro.
- Ko te pouwaenga (C). E whakaaetia ana ki ngā rohe e toru o te papa tākaro, engari kaua ngā porohita ūhanga. Ka āpititū ia i te pouwaenga o te hoariri, he aukati, he whakararu i te makanga pōro a te hoariri, he āwhina hoki i tōna kapa ki te maka i te pōro ki tōna kaikuru ūhanga. He taukaea ki waenganui i ngā kaitākaro kaupare me ngā kaitākaro kōkiri o tōna kapa.
- Ko te kaikōkiri paihau (WA). E whakaaetia ana ki te rohe waenga me te rohe ūhanga kōkiri. Ko tana mahi matua he maka i te pōro ki tētahi o ana hoakapa ki roto i te porohita ūhanga, ka āpititū ia i te tākaro a te kaipare paihau o te hoariri.
- Ko te kaikōkiri ūhanga (GA). E whakaaetia ana ki te rohe waenga, te rohe ūhanga kōkiri me tōna porohita ūhanga. Ko āna mahi matua he whāngai i te pōro ki tana kaikuru ūhanga, he kuru ūhanga, he whakauaua i tā te hoariri maka i te pōro.
- Ko te kaikuru ūhanga (GS). E whakaaetia ana ia ki te rohe ūhanga kōkiri, ā, ko tana mahi matua he kuru ūhanga. He pūkenga ōna ki te karo i ngā kaipare o te hoariri kia māmā ai tā ōna hoakapa whāngai i te pōro ki a ia.
E whā ngā hauwhā o tētahi kēmu poitarawhiti, 15 meneti te roa o ia hauwhā.
Koia nei ētahi mahi i runga i te papa tākaro poitarawhiti:
- Ka tīmata ia hauwhā o te kēmu ki te maka waenga. Kia kotahi te waewae o te pouwaenga ki te porohita waenga, ā, ka makaia e ia te pōro ki tētahi hoakapa. Ka whai te hoariri ki te haukoti i te pōro. Ina piro tētahi kapa, ka hoki anō ki te maka waenga hei tīmata anō i te kēmu. Ka hohoko haere te maka waenga ki tēnā kapa, ki tēnā kapa.
- He kēmu hohoro te poitarawhiti. Kāore e whakaaetia kia roa ake i te toru hēkona te mau a tētahi i te pōro, arā, me wawe tana maka ki tētahi o ana hoakapa. Ki te roa ake i te toru hēkona, ka kīia he pōro mau, ā, ka hāmenehia taua kapa. Ka tukuna te pōro ki te hoariri hei maka pātea mā rātou.
- Ki te hou atu tētahi kaitākaro ki tētahi wāhi o te papa tākaro kāore e whakaaehia ana taua tūranga, ka hāmenehia ia, ka tukuna he maka pātea ki te hoariri. Ka kīia tērā he tūhapa.
- Ko te rakawae tētahi mea nui i te poitarawhiti, arā, te tau me te neke o te waewae ki te papa. E pai ana tā te kaitākaro hopu i te pōro mēnā kotahi, e rua rānei ōna waewae e tau ana ki te papa, kei runga ake rānei ia i te papa e peke ana, e hārō ana. Mēnā kotahi tana waewae e tau ana ki te papa, ka kīia tērā ko tana waetau. E whakaaetia ana te hīkoi kotahi ki tērā atu waewae, engari kāore e whakaaetia kia pā anō tana waetau ki te papa. Ko te tukupōro hei maka pātea mā te hoariri te hāmene.
- Kāore e whakaaetia te hōtaetae i tētahi kaitākaro o te hoariri, arā, kia kaua e iti iho i te 0.9 mita te tata o te kaipare ki te kaikōkiri i te pōro. He maka pātea mā te hoariri te hāmene ina pērā.
- He hākina tukikore te poitarawhiti, kāore e whakaaetia te tuki a tētahi kaitākaro i tētahi. Ahakoa tērā, he pai noa iho te pā tinana mēnā kāore e auwahatia te tākaro a tētahi.