pakihi

WhakamĀrama Āpitihanga

Ko te mahere pakihi, koia te āta whakatakoto i te kaupapa o te pakihi, te huarahi e tutuki ai ōna whāinga, tae atu ki te taha ahumoni, arā, te whakaemi pūrawa hei tīmata, hei whakatipu rānei i te pakihi, ngā whakapaunga, ngā moniwhiwhi, te utu tāke, me te maha noa atu.

Koia nei ētahi momo pakihi:

• Ko te pakihi kiritahi. Kotahi te tangata nāna te pakihi. Kāore i ōkawa te manatōpūtanga o te pakihi, nō reira ko te tangata tonu kei te kawe i ngā tūraru ahumoni, ko ia hoki kei te whiwhi i ngā painga, i ngā monihua.
• Ko te rangapū mahitahi. He whakaritenga ōkawa tēnei ki waenganui i ētahi tāngata tokorua, tokohia kē atu rānei. Ko ngā hoa pakihi katoa ka whakaemi pūrawa hei tīmata, hei whakatipu rānei i te pakihi, ka kawe i ngā tūraru ahumoni, ka whiwhi hoki i ngā painga. I ētahi, ko ngā hoa pakihi katoa kei te whakahaere i te pakihi, kei te mahi i ngā mahi o ia rā. I ētahi, he hoa pakihi kāore e whai wāhi atu ki ngā mahi whakahaere, ki ngā mahi rānei o ia rā. Ka kīia ia he hoa ngū.
• Ko te umanga taunaha tāpui. He pakihi nā tētahi kāhui kaiwhaipānga, he hinonga ake e tū wehe kē ana i ōna kaiwhaipānga i raro i te ture. Ka tuarihia ngā tūraru me ngā painga ki ngā kaiwhaipānga katoa i runga anō i te wāriu o ngā pānga o tēnā me tēnā. Ka riro i ngā kaiwhaipānga tētahi utu i ia tau, ka kīia he utu whaipānga, i runga anō i te nui o te monihua a te umanga i taua tau rā.
• Ko te rangatōpū. He umanga nui, he tōpūtanga umanga rānei e whaimana ana i raro i te ture hei hinonga tūtahi. Kāore te hunga kaiwhaipānga o te rangatōpū e kawe i ngā pūnama a te rangatōpū, arā, ka tū wehe kē te rangatōpū i ōna kaiwhaipānga. Ka toro atu ngā mahi me ngā whakahaere a ētahi rangatōpū nui ki ētahi whenua maha, ka kīia ērā he rangatōpū whenuarau.

Mēnā ko te pakihi kotahi kei te whakaputa, kei te hoko i tētahi ratonga, i tētahi momo hautaonga rānei i tētahi tāone, i tētahi rohe rānei ka kīia he mana tōtahi tērā, karekau he pakihi whakataetae. Ko tētahi hua o te mana tōtahi, ko te piki o te utu mō te hautaonga, mō te ratonga rānei. Mēnā e rua anake ngā pakihi o tētahi wāhi e hoko ana i tētahi ratonga, i tētahi hautaonga rānei, ka kīia tērā ko te manatōrua.

Mēnā e whai tūtanga ana te tangata ki tētahi pakihi, nāna tētahi wāhanga o ngā huarawa me ngā pūnama o taua pakihi. E tātaihia ai te tūtanga a te tangata, ka tangohia ngā pūnama katoa i te tapeke o ngā huarawa o te pakihi, kātahi ka whakareatia ki te ōrau o ngā pānga e puritia ana e te tangata rā.