WhakamĀrama Āpitihanga
E tātaihia ai te wāiru pūrawa wātea o tētahi whakahaere, ka tangohia ana pūnama i ana huarawa wātea. Arā:
Mēnā he tōraro te pūrawa wātea o tētahi pakihi, kei te raru pea taua pakihi nā te kore o te moni hei whakahaere tonu i te pakihi, hei whakatipu i te pakihi, hei whakaea i āna nama.
Mēnā he tōrunga te pūrawa wātea o tētahi pakihi, he tohu tērā i te ora o taua pakihi, inā e taea ana āna mahi te whakahaere tonu, te whakatipu, me te whakahoki moni anō ki ana kaiwhaipānga.
E rima ngā momo huarawa a tētahi pakihi:
- Ko ngā huarawa ōkiko, pērā i te whenua, i te whare, i te waka, i te rorohiko, i te mīhini, me te maha noa atu. Ka kīia ēnei he huarawa pūmau. Ko ngā mīhini me ngā pūrere a te pakihi, ka kīia he taputapu pūrawa.
- Ko ngā huarawa tahua, pērā i te haumitanga moni.
- Ko ngā huarawa hirikapo, pērā i te ingoa o te pakihi (he wāriu tō te ingoa mēnā e mōhiotia whānuitia ana), me ngā mana whakairo hinengaro e puritia ana.
- Ko ngā pūmanawa tangata pērā i te mātauranga me ngā pūkenga o ngā kaimahi ki te whakatutuki i ngā mahi o te pakihi.
- Ko ngā nama kia utua mai, arā, ko ngā moni kāore anō kia utua e ngā kiritaki, engari kua tukuna kētia e te pakihi te hautaonga, te ratonga rānei.
Me he māmā te huri i tētahi huarawa hei moni, ka kīia tērā he huarawa māngohe, pērā i te pūtea haumi. Ko te māngohe o tētahi pakihi, koirā te māmā, te uaua rānei o te huri i ōna huarawa hei moni.
Ko ngā pūnama a tētahi pakihi, koirā ana nama katoa. Hei tauira, ko ngā nama kia utua atu, ko ngā mōkete, ko ngā ratonga kua utua kētia e tētahi engari kāore anō kia mahia e te pakihi, ko ngā tāke hei utu mā te pakihi.
Mēnā e tōnui ana te ōhanga, ā, e pai ana te whakahaere i te pakihi, ko te pikinga wāriu pūrawa te hua. Mēnā kāore e pai ana te ōhanga, he koretake rānei te whakahaere i te pakihi, ko te hekenga wāriu pūrawa te hua.