tāpoi

WhakamĀrama Āpitihanga

Koia nei ētahi momo tāpoi:

• Ko te tāpoi rohe taiwhenua. Koia ko te hāereere a te tangata i tōna ake whenua ki te toro i ngā wāhi ki waho atu i tōna haukāinga.
• Ko te tāpoi mai i tāwāhi, arā, ko te toro mai a te hunga manene o whenua kē ki Aotearoa.
• Ko te tāpoi ki tāwāhi, arā, ko te toro atu a ngāi Aotearoa ki whenua kē.
• Ko te tāpoi mātātoa. He manawa kai tūtae tēnei hunga wae tāpoi, ka whai wāhi atu ki ngā mahi mātātoa, pērā i te tirikohu waehere, i te eke kohuka, i te eke pahikara me te hīkoi roa i ngā papa tāpui o te motu.
• Ko te tāpoi ahurea, arā, ko te toro a te tangata ki ngā kaupapa e whakaata ana i te ahurea o te whenua, o te rohe rānei, pērā i te ahurea Māori i Whakarewarewa me te whare pupuri taonga.
• Ko te tāpoi tautaiao. Koia ko te toro a te tangata ki ngā taiao māori ki te tautoko, ki te āwhina pea i ngā mahi whāomoomo, ki te tirotiro noa rānei i tētahi āhuatanga motuhake o te taiao pērā i te manu.
• Ko te tāpoi taiopenga. I konei ko te take e toro atu ai te tangata ki tētahi wāhi, ko te taiopenga, ko te hui taurima, ko te tātāwhāinga hākinakina, ko te whakaari, ko te whakaaturanga puoro mataora, ko tētahi taiopenga kē atu rānei e tū ana ki taua wāhi rā.

Arā ngā painga ka hua ake i te mahi tāpoi, pērā i te whiwhi mahi me ngā painga ohaoha. Arā hoki ētahi whakararu tērā anō pea ka hua ake, pērā i te muia o ngā wāhi motuhake ki te tini o te wae tāpoi, me te aha, ka waimeha haere te mauri o aua wāhi rā, ka parahanga anō hoki.