WhakamĀrama Āpitihanga
Ko tā te rangatohe huatika āhuarangi, he whakatairanga i te reo o ngā iwi taketake, i te reo o te hunga rangatahi, o ngā hapori pūharakeke anō hoki; he kōkiri i te tohe matua nei, nā ngā whenua whairawa o te ao, nā te ahumahi koranehe me ōna rangatōpū whairawa, i ara ake ai te āhuarangi hurihuri, nō reira mā rātou anō e pīkau ngā mahi nui me ngā utu hei whakapōturi i te mahana haere o te ao.
He mahi uaua te tohe me te pakanga mō te huatika āhuarangi, inā ko te hunga whairawa, ko ngā rangatōpū nui, ko te ahumahi koranehe te hoariri. E tino warawara ana, e tino whirinaki ana te nuinga o tātou ki te hoko, ki te whakamahi, ki te whakapeto i ā rātou whakaputanga, pēnei i te kōhinu, i te pūrere tāhiko me te kirihou. Koia rā te tūāpapa o te ōhanga angahaorawa me te ōhanga torotika. He nui te whiwhi a te whairawa, a te rangatōpū nui, ko ngā hapori pū harakeke, ko ngā iwi taketake, ko te taiao te papa.
I ētahi whenua, kua whakatauria he tāke waro hei utu mā te hunga e tuku hauhā (CO2) ana ki te kōhauhau, pērā i te hunga taraiwa waka, i ngā umanga kawekawe me ngā kaipāmu. Ko te whāinga o tēnei momo tāke kia whakaitia te whakamahinga o te koranehe me te tukutanga o te hauhā, ko te kohi pūtea anō hoki mō ngā kaupapa whakamauru i ngā hua kino o te āhuarangi hurihuri.
E tino kitea ana te kaikiri taiao i ētahi porihanga, i ētahi whenua, inā te whakatū taupuni para tāoke ki ngā wāhi e nohongia ana e tētahi iwi taketake, e tētahi hapori pakukore rānei. E kore rawa ērā e whakatūria ki te wāhi e nohongia ana e te hunga whairawa. Hei tauira, ko te kāinga kuha nei i Mumupai, Inia:
E tino pāngia ana ngā moutere whenua o Te Moana-nui-a-Kiwa ki ngā whakararu o te āhuarangi hurihuri, mātua rā ko te piki o te pae moana. E whawhaitia ana te huatika āhuarangi mō Te Moana-nui-a-Kiwa ki Te Rūnanga Whakakotahi i ngā Iwi o te Ao. Hei tauira, he whenua tāpotupotu te moutere o Tuvalu, ā, e kitea ana i tēnei pikitia te pātata o ngā kāinga ki te moana, me te aha, he aitua nui ka hua ake i te piki o te pae moana:
