taiopenga

WhakamĀrama Āpitihanga

Arā ētahi taiopenga tūmatanui e wātea ana ki te marea, he utukore ētahi. Arā hoki ētahi me utu tā te tangata kuhu atu, me hoko tīkiti rānei. Arā anō ngā taiopenga tūmataiti, mā te pōhiri kē e uru atu ai te tangata ki roto.

Koia nei ētahi momo taiopenga:

• Ko te hui taurima. He huihuinga tēnei hei whakanui i tētahi āhuatanga o te hapori, i tētahi āhuatanga rānei o te iwi, o te hāhi. Hei tauira ko te Hui Aranga, te hui taurima a te hāhi Katorika ka whakatūria i ia tau; ko te taiopenga kai tuputata; ko te hui taurima puoro. Mēnā he whakanui i te iwitanga, arā he taiopenga ā-iwi, ka kīia e ētahi he hui ahurei tērā, he taiopenga ahurea.
• Ko te tātāwhāinga. He taiopenga hākinakina tēnei, he whakataetae e toa ai tētahi i te mutunga iho, he whakataetae-kore rānei mō te pārekareka noa iho te take.
• Ko te whakaaturanga a-rēhia, pērā i te whakaaturanga kapa haka, i te konohete puoro me te whakaari hei whakangahau i te hunga mātakitaki. Ko Te Matatini, ko Womad ētahi tauira o tēnei momo taiopenga.
• Ko te hui taumata, arā, he kāpunitanga o ngā tāngata e whai pānga ana ki tētahi kaupapa, ki tētahi ahumahi, ki tētahi mea kē atu rānei, ki konā whakawhiti kōrero ai, wānanga ai i aua kaupapa rā.
• Ko te huihuinga hei kawe, hei whakatutuki i tētahi tikanga Māori, i tētahi kawa rānei, pērā i te whakatuwheratanga whare, i te whakatau manuhiri me te kawe mate.