WhakamĀrama Āpitihanga
Anei ngā pūmārō matua o tētahi rorohiko papamahi. Ka kīia te tukuoro me te mata, he pūrere tāputa, inā he whakaputa oro, he whakaatu ata rānei te mahi. Ka kīia te papapātuhi, te kiore, te hopuoro me te kātuku, he pūrere tāuru. Mā ēnei pūrere e whakaurua ai he raraunga, he tohutohu rānei ki te rorohiko. Ko tā te kātuku, he hopu ataata hei pupuri ki te rorohiko, hei tuku rānei ki rorohiko kē atu mā te ipurangi:
He rorohiko kawekawe tēnei. He kauhuri te mata, ā, kei te rorohiko tonu te papapātuhi. He papapā tōna hei whakakapi i te wāhi ki te kiore:
He paparorohiko tēnei. He rorohiko kawekawe, karekau ōna papapātuhi ōkiko nei, engari he papapātuhi ā-mata tōna. Ko te īPapa tētahi momo e mōhio whānuitia ana, nā Apple i whakaputa i te tau 2010. E taea ana te mata whakapā o ēnei pūrere te pato hei kōwhiri i tētahi kōnae, i tētahi tono rānei, ka taea hoki te miri hei hūnuku i ngā tūemi, hei huri rānei i te katoa o te mata:
Nā te karangatanga rorohiko whaiaro te rorohiko papamahi, te rorohiko kawekawe me te paparorohiko. Katoa ēnei e pai ana i te kāinga, i te kura, i te wāhi mahi rānei, e tutuki ai ngā mahi pērā i te tukatuka kupu, te mātaki ataata, te whakarongo puoro, te tuku īmēra, me ērā atu tūmomo mahi o ia rā.
He momo rorohiko hoki te waea atamai, inā he pūtukatuka matua tōna, he pūmanawa whakahaere hoki.
Ko te pūnaha rorohiko, koirā ngā waehanga katoa e tutuki ai i te rorohiko āna mahi. Arā, ko ngā pūrere pūmārō pērā i te papapātuhi, i te kiore, i te rorohiko tonu, ko ngā pūmanawa hoki pērā i te pūnaha whakahaere.