WhakamĀrama Āpitihanga
Ko te īmēra paraurehe, koirā ngā īmēra kāore e hiahiatia ana, ko te nuinga he pānui hokohoko kua tukuna ki te mātinitini. He māminga te take o ētahi kia whai wāhi atu te nanakia ki tō rorohiko, ki tō pūtea pēke, ki ō kōrero tūmataiti rānei. He tuapeka te mahi a ētahi, arā, he tipatipa i te wāhitau īmēra e tukuna ai te īmēra, ānō nei nā tētahi wāhitau whai mana i tuku, pērā i te pēke. Ka pōhēhē te kaiwhiwhi he īmēra pono.
Hāunga ngā īmēra paraurehe, ka tae atu ngā īmēra ki te pouakauru. Arā atu anō ētahi kōpaki īmēra, koia nei ētahi:
- Ko te īmēra tuku, arā, ko ngā mea kua oti kē te tuku.
- Ko te īmēra hukihuki, arā, ko ngā mea kāore anō kia tukuna, engari kei te puritia ki tō rorohiko hei whakaoti māu.
- Ko te īmēra muku, arā, ko ngā mea kua tukuna e koe ki te ipupara.
- Ko te pouakaputa, arā, ko ngā īmēra kāore anō kia oti te tukutanga.
Ko te pūkete īmēra he whakaritenga ki tētahi kaiwhakarato ipurangi, e whakatūria ai he wāhitau īmēra.
I tēnei īmēra, ko te wāhitau īmēra o te kaiwhiwhi mātāmua ko 'office@kupengahao.co.nz'. Mēnā ka tukuna hoki ki tētahi kaiwhiwhi mātāmuri, ka tuhia tana wāhitau ki te 'cc'. Ka kīia tērā ko te kape. Mēnā ka tuhia he wāhitau īmēra ki te 'Bcc', ka tukuna hoki te īmēra ki a ia, engari kāore tērā wāhitau e whākina ki te kaiwhiwhi mātāmua. Ka kīia tērā ko te kapehuna. Ka taea hoki tētahi kōnae, tētahi tuhinga rānei te āpiti atu ki te īmēra, ā, ka tukuna hoki te āpitihanga ki te kaiwhiwhi:
E taea ana te waitohu a te tangata tuku īmerā te whakauru ki te mutunga o tana īmēra. Arā pea, ko ngā whakamōhiotanga pērā i tōna ingoa, i tōna tūranga mahi, i tana wāhitau tukutuku, i tana nama waea, me ētahi atu. Mā te tangata tonu tēnei e whakauru, ka whakaritea rānei kia aunoa tā te rorohiko whakauru i te waitohu.