WhakamĀrama Āpitihanga
Hei tauira o ētahi momo pūmanawa:
- Ko te pūmanawa ārai wheori, pērā i te Norton.
- Ko te pūmanawa īmēra, pērā i te Outlook.
- Ko te pūmanawa pūtirotiro tukutuku, pērā i te Chrome.
- Ko te pūmanawa ripanga, pērā i te Excel.
- Ko te pūmanawa tukatuka kupu, pērā i te Word.
Ka kīia ētahi momo pūmanawa he pūmanawa pata. Ko tā tēnei momo, he aroturuki, he tātari, he whirihora, he tautiaki i te rorohiko. I te nuinga o te wā, ka whakaurua ēnei ki te pūnaha whakahaere, pērā i te pūmanawa ārai wheori, i te papatopenga, i te pūmanawa patuiro.
Ka waeheretia ngā tohutohu o roto i te pūmanawa e te kaihanga pūmanawa, hei whaitanga mā te rorohiko, e tutuki ai ngā mahi o taua pūmanawa.
Ko te tauaro o te pūmanawa, ko te pūmārō, arā, ko ngā pūrere ake. He mea ōkiko te pūmārō, ka pāngia e te ringa. Kāore te pūmanawa e pāngia e te ringa.
Ko te pūmanawa mārō, koirā ngā pūmanawa ka noho tonu ki te pūmahara pānui-anake o te rorohiko, kei reira ngā raraunga hei tohutohu i te haere o te rorohiko. He tukanga motuhake te whakarerekē, te muku rānei i te pūmanawa mārō, tē taea e te kaiwhakamahi.
I ētahi wā, ka tāutangia e te kaihanga pūmanawa he pūmanawa atu anō ki te pūrere e hokona ana, kāore e hiahiatia ana e te kaihoko. Ka kīia ēnei he pūmanawa tūrākaha, inā he whakapōturi i te haere a te rorohiko te hua.
Ko te pūmanawa herekore e wātea ana ki te marea, karekau he utu, ā, e taea ana te waehere o roto i te pūmanawa te rāwekeweke kia hāngai ai ki ngā hiahia ake o te kaiwhakamahi. Ko te Perl hei tauira o tētahi reo papatono herekore.
Karekau he utu mō te pūmanawa utukore, engari kāore e taea tōna waehere te rāwekeweke, kāore e whakaaehia rānei te rāwekeweke i raro i te ture manatārua.