pūrere

device (computing)

WHAKAMĀRAMA

He kupu whānui mō tētahi mea ōkiko ka hangaia hei whakatutuki i tētahi mahi. He māmā ētahi, pērā i te pūniko hei ine taumaha. I ēnei rā he tāhiko te nuinga o ngā pūrere o te ao hangarau.

A broad term for something which is made to complete a particular function. Some are simple such as a spring for measuring weight. Contemporary devices in the area of technology are usually electronic in nature.

Tauira KŌrero

Kāore e whakaaetia ana he pūrere matihiko ki te tēpu kai i tō mātou kāinga.

Ko tā te kura, mā te ākonga tonu tāna ake pūrere e mau mai ki te kura.

Ko te nuinga o ngā momo pūrere o ēnei rā he mea ka honoa atu ki te ipurangi.

WhakamĀrama Āpitihanga

Ko te mīhini tētahi momo pūrere, he ōkiko te hanga, pērā i te nihowhiti me te mekameka o tētahi pahikara hei whakahuri i te wīra o muri.

Ko te pūrere matihiko tētahi whakarōpūtanga matua. Ka taka ki tēnei rōpū ko te rorohiko, ko ngā momo pūrere kawekawe pērā i te waea pūkoro, i te waea atamai, i te paparorohiko me te wati atamai, ko te hangaoro, ko te maha noa atu. Ko te hiko te pūngao whakahaere, ā, ka honoa ētahi ki te ipurangi.

Mēnā e taea ana e tētahi pūrere āna mahi me te kore e tūhono atu ki pūrere kē, ka kīia he pūrere tūhāhā. He pūrere tūhāhā te waea pūkoro. Ehara te papapātuhi i te pūrere tūhāhā, inā kāore ōna take ki te kore e honoa ki te rorohiko.

Mā te pūrere tāuru e whakaurua ai he tohutohu ki te rorohiko, ki tētahi atu momo pūrere matua rānei. Ko te kiore, ko te papapātuhi hei tauira. He pūrere tītohu ētahi o ēnei, inā ko te tohu i tētahi mea e kitea ana i te mata o te rorohiko te mahi. Ko te kiore, ko te papatā, ko te kakautohu hei tauira.

Ko te pokitaringa, te purutaringa, te kaupane me te pūrere tā ētahi tauira o te pūrere tāputa, inā he whakaputa oro, he whakaatu ata, he whakaputa tānga ki te pepa rānei te mahi.