WhakamĀrama Āpitihanga
Ka puritia ia wehenga raraunga mōkito ki te kōnae hei tau tāhūrua. Ka noho mai ēnei kōnae ki rō kōpaki, ki ngā pūmahara rāroto, pūmahara rāwaho hoki o te rorohiko. He wā anō ka puritia ngā kōnae ki te kapua.
He mea nui kia nahanaha te pupuri i ngā kōnae ki ngā kōpaki, e māmā ai te kimi me te tiki atu i ngā kōnae e hiahiatia ana. Ka kīia te pūnaha pupuri kōnae he tātai, ā, he rite ki te whakapapa te raupapa o ngā kōnae ki reira, arā, e whai paparanga ana. Ka kīia te kōnae kei te pane o te tātai, ko te tātai pūtake. Hei tauira:
Hei tauira tēnei o tētahi ara kōnae, ara ingoa rānei:
Ina hāmate tētahi kōnae, kāore e taea e te rorohiko ngā raraunga kei taua kōnae te pānui. Ka hāmate pea te kōnae nā te hapa o te rorohiko i te wā e tiakina ana ngā raraunga, nā te hē o te pūmahara, nā te wheori rānei kua uru mai ki te rorohiko. Ina hāmate tētahi kōnae, ka ora pea te kaiwhakamahi rorohiko i te kōnae pūrua kua puritia ki wāhi kē atu, pērā i tētahi pūmahara rāwaho. I ētahi rorohiko he aunoa te pūrua kōnae i ia rā.
He maha ngā momo hōputu kōnae, ā, ka whakarōpūngia ēnei i runga i te momo raraunga e puritia ana. Hei tauira:
- Ko te kōnae oro pērā i te .mp3 me te .wav.
- Ko te kōnae kōpeke pērā i te .zip. Ko tā tēnei momo he pupuri i ētahi kōnae maha ki te kōnae kotahi, waihoki he iti ake i te kōnae matua kia pai ai te tiki ake, te tuku atu rānei. Arā, ka kōpekehia ngā kōnae kia kaua e pērā rawa te whakapau mokowā rokiroki i te pūmahara. Mā te whai i te tukanga wetekōpeke e unuhia ai ngā raraunga o te kōnae kōpeke, e taea ai aua raraunga te tukatuka.
- Ko te kōnae ata pērā i te .jpeg, te .tiff me te .gif.
- Ko te kōnae tukatuka kupu pērā i te .doc, te .txt me te .pdf.
E tohu ana ēnei ata i te kōpaki. Kei roto i ngā kōpaki nei he kōnae, he tuhinga rānei e puritia ana. Ina pāwhiria te kōpaki ka huakina, ā, ka kitea ngā kai o roto.
E tohu ana ēnei ata i ētahi momo kōnae. Ina pāwhiria tētahi, ka huakina taua kōnae.
