WhakamĀrama Āpitihanga
Ko ngā mahi matua a te pūnaha arahau:
- He whakahaere i te tukanga e rongo ai te tangata i te kakara me te haunga.
- He whakahaere i te tukanga whakaputa oro.
- He whakamahana i te hau ka whakangātia kia rite ki te paemahana o te tinana.
- He tuku i te hāora ki roto i ngā toto ka kawea ki ngā pūtau katoa o te tinana mā roto i ngā ia-tuku.
- He tango i te hauhā me ētahi atu matū tāoke i ngā toto hāora-kore ka hoki mai mā roto i ngā ia-auraki, ā, ka whakaputaina ki waho o te tinana.
- He whakahaumaru i ngā arahau kia kore ai e uru he matū tāoke, he matū whakamangeo rānei.
Ko te mominga hau ki roto i te tinana, ka kīia tērā ko te whakangā. Ko te whakaputa hau ki waho, ka kīia ko te whakahā, koia rā ngā wāhanga e rua o tēnei mea te hēhē. Arā, ko te 'hā ki roto' me te 'hā ki waho'.
Koia nei ngā wāhanga matua o te pūnaha arahau. Ko te ihu, te pongāhau, te korokoro me te paeoro ngā wāhanga matua o te arahau runga, ko te pūkorokoro, ngā pekahau, ngā pekahau ririki, me ngā miru ngā wāhanga o roto i te arahau raro:
whakaahua arinuiKo te mahi a ngā miru, he whakawhiti i te hāora ki ngā toto, he kapo i te hauhā:
:
Koia nei ētahi momo mate arahau:
- Ko te pūkahu kakā. Ka poke tētahi o ngā pūkahukahu, ngā pūkahukahu e rua rānei. He poke huaketo, he poke huakita rānei inā ka noho mai he wē pirau ki ngā miru i roto i ngā pūkahukahu. Tērā hoki te tūraru ka totoka te pirau. Ko te mare, ko te poho mamae, ko te kirikā, ko te uaua o te hēhē ngā tohumate matua o te pūkahu kakā.
- Ko te huangō. Ka tino whāiti haere ngā pekahau. Ko te mare me te ngāngā ētahi tohumate o te huangō. Ko ētahi takenga mai o te huangō, ko te pāwera o te tangata ki tētahi matū o te taiao (pērā i te hae), ko te kai pūroi, ko te kori tinana, ko te parahanga o te hau takiwā.
- Ko te pekahau kakā. Ka poke, ka kakā ngā pekahau e kawe ana i te hāora ki ngā pūkahukahu. Ko te mare te tohumate matua, ā, ka tuhaina te hūpē kukū
- Ko te miru pupuhi. Ka raru ko ngā miru iti kei roto i ngā pūkahukahu, ā, ka kōpaka te hāora ka tukuna ki roto i ngā toto. Ka ngāngā te tangata, he uaua tana hēhē. Ko te momi tupeka te takenga matua o tēnei māuiui.
- Ko te miramira kakā. E rua ngā pōkurukuru pūtautau kei muri o te korokoro, he wāhanga o roto i te pūnaha awhikiri o te tangata hei kaupare pokenga, ka kīia he miramira. I ētahi wā, haere tahi ai te miramira kakā me te rewharewha, ko te korokoro mamae te tohumate matua.
- Ko te pakohu ihu kakā. Ka uaua te whakangā hau ki roto i te ihu nā te kakā me te pupuhi o ngā pakohu ihu. Ka kore e paheke te hūpē, ka noho purutiti kē. Ka piki te pēhanga i ngā pongāhau, i ngā whatu, i ngā taringa, he mahunga ānini pea te otinga atu.
- Ko te paeoro kakā. He poke huaketo rangitahi, ka ngaro te reo mō tētahi wā poto, ka whango rānei te reo.
- Ko te riwha pūkahukahu. Ka pā tēnei mate ki ngā pūtautau o roto i ngā pūkahukahu, nā te momi puehu tāoke, pērā i te puehu tēpoko me te puehu waro. Ka uaua te hēhē, ka ruhi te tinana, ka pākia ki te mare pūtī.