WhakamĀrama Āpitihanga
Koia nei ngā wāhanga matua o tētahi pūtau tangata:
- Ko te paetara pūtau. Ko te paenga tēnei o te pūtau. Ko te mahi a te paetara pūtau he aukati i ētahi matū kia kore ai e uru, e puta rānei i te pūtau, he tuku rānei i ētahi matū kia uru, kia puta i te pūtau.
- Ko te miru. He pātaka te miru, ki reira puritia ai te wai me ngā kai e ora ai te pūtau.
- Ko te tuipūmua. Ki konei hangaia ai tētahi o ngā taiora hei whāngai i te pūtau. Ko te pūmua te ingoa o taua taiora.
- Ko te karihi. Ko te wāhanga e whakahaere ana i te mahi a te pūtau. Kei roto i te karihi ngā ira e kawe ana i ngā āhuatanga tuku iho motuhake o te tangata.
- Ko te waitepe. Ko te wē i roto i te pūtau, e kawe ana i te wai me ngā taiora e ora ai te pūtau, ki reira hoki ngā tauhohenga matū.
- Ko te pata pūngao. Mā te pata pūngao e huri ai ngā taiora o roto i te waitepe hei pūngao mō te pūtau.
- Ko te pūnaku. Hei wāwāhi i ngā para o te pūtau, hei horoi hoki i ngā matū tāoke o roto i te waitepe.
Ko te noho tōpū o ētahi pūtau rite, ka kīia he pūtautau. He ōrite te mahi a aua pūtau e noho tahi ana. Hei tauira, ko te pūtautau io te whakatōpūtanga o ngā pūtau io.
Ko te noho tōpū o ētahi pūtautau rerekē, ka kīia he whēkau. Hei tauira, ka hangaia tētahi uaua ki te pūtautau uaua, te pūtautau io me te pūtautau toto. Ko tā te whēkau he whakatutuki i ētahi mahi motuhake o te tinana, pērā i te tākihi – ko tāna he tātari i ngā para o te tinana.
Ko te noho tōpū me te mahi tahi a ētahi whēkau, ka kīia he pūnaha tinana. Hei tauira, ko te noho tahi o ngā tākihi, te tōngāmimi me ngā pū tūhonohono, ka kīia ko te pūnaha tukupara.
Mā ngā pūnaha tinana e tutuki ai ngā mahi e ora ai te tangata pērā i te nakunaku kai, i te tukupūngao, i te tukupara, i te tipu, i te neke me te whakaputa uri:
