WhakamĀrama Āpitihanga
E toru ngā mātāpono tūāpapa o te ōhanga āmiomio:
- Kia hoahoatia, kia whakatūria ngā pūnaha hei whakakore i te para me te parahanga.
- Kia tukurautia ngā matū me ngā hautaonga, kia roa ai te wā toiora o aua matū me aua hautaonga.
- Kia whakarauoratia ngā pūnaha māori o te ao tūroa.
He tukanga toitū, he pūnaha amio kati te pūtake o te ōhanga āmiomio. Hei tauira o te pūnaha whakapeto hautaonga āmiomio:
Ko te ōhanga torotika te tauaro o te ōhanga āmiomio. He nui te moumou, he nui te para, he nui te parahanga i tēnei pūnaha, waihoki karekau he paku whakaaro ki te ora o Papatūānuku me ōna tini. Ko te mahi moni te whāinga matua i te pūnaha whakapeto torotika. Hei tauira:
Ko te raupapa o ngā mahi mai i te hukenga o te rawa taketake hei waihanga i tētahi hautaonga, ki te porowhiunga o taua hautaonga rā, ōna waehanga rānei ki te ruapara, ka kīia ko te huringa hautaonga. He poto noa iho te huringa hautaonga i te ōhanga torotika, kāore e tukuruatia, e hangaruatia rānei te hautaonga. I te ōhanga āmiomio, he roa ake te huringa hautaonga, he whaihua ake te whakamahinga o ngā rawa, ka mutu, he toitū ake.
E tino hono ana te āhua o te ōhanga ki ngā mōtika tangata me te āhua o te porihanga. I te ōhanga torotika ka noho te nuinga hei kaimahi, e nui ai te whiwhi a te hunga nā rātou ngā pakihi nui, nā rātou ngā rangatōpū nui. I te ōhanga āmiomio ka hāpaitia te rangatiratanga o te tangata, o te iwi, o te hapori, ka mutu he tōkeke ake te tuari i ngā rawa hei painga mō te katoa, kāore mō te tokoiti noa iho.