WhakamĀrama Āpitihanga
E toru ngā mātāpono tūāpapa o te ōhanga āmiomio:
- Kia hoahoatia, kia whakatūria ngā pūnaha hei whakakore i te para me te parahanga.
- Kia tukurautia ngā matū me ngā hautaonga, kia roa ai te wā toiora o aua matū me aua hautaonga.
- Kia whakarauoratia ngā pūnaha māori o te ao tūroa.
He tukanga toitū, he pūnaha amio kati te pūtake o te ōhanga āmiomio. Hei tauira o te pūnaha whakapeto hautaonga āmiomio:
Ko te ōhanga torotika te tauaro o te ōhanga āmiomio. He nui te moumou, he nui te para, he nui te parahanga i tēnei pūnaha, waihoki karekau he paku whakaaro ki te ora o Papatūānuku me ōna tini. E rima ngā kaupae matua o roto i te pūnaha whakapeto torotika, ā, he nui te pūngao ka whakapaua i ia kaupae:
- Ko te huke. Arā, ko te tango, te unu, te kohikohi rānei i tētahi rawa taketake, pērā i te hinu, i te waro, me te onepū rino.
- Ko te waihanga. Koia ko te whakamahi i ērā rawa taketake hei waihanga i tētahi momo matū, pērā i te rino, i te kirihou, i te konumohe me te pepa. Ka whakamahia aua matū hei whakanao hautaonga, pērā i te pātara inu, i te motukā, i te kākahu me te pūrere tāhiko.
- Ko te tohatoha i aua hautaonga. Mātua rā ka kawea mā tētahi momo tūnuku, pērā i te wakarangi, i te taraka, me te kaipuke. Ka kawea ki ngā mākete, ki ngā pokapū tohatoha, ā, atu i reira ki ngā toa hei hoko mā te marea.
- Ko te whakapeto i te hautaonga. Hei tauira, ko te whakapau kōhinu i te motukā; ko te hoko pātara wai kirihou; ko te hoko waea pūkoro hou i ia tau; ko te whakapeto hiko hei whakamahana i te whare.
- Ko te porowhiu. Arā, ka porowhiua te hautaonga nā te kore e hiahiatia tonutia, nā te pakaru, nā te whakapetonga rānei. Ka porowhiua ki te taupuni hangarua, ki te taupuni taumanu rawa, ki te ruapara rānei, ka porowhiua taurekarekatia rānei.
Ko te mahi moni te whāinga matua i te pūnaha whakapeto torotika. Hei tauira:
Ko te raupapa o ngā mahi mai i te hukenga o te rawa taketake hei waihanga i tētahi hautaonga, ki te porowhiunga o taua hautaonga rā, ōna waehanga rānei ki te ruapara, ka kīia ko te huringa hautaonga. He poto noa iho te huringa hautaonga i te ōhanga torotika, kāore e tukuruatia, e hangaruatia rānei te hautaonga. I te ōhanga āmiomio, he roa ake te huringa hautaonga, he whaihua ake te whakamahinga o ngā rawa, ka mutu, he toitū ake.