WhakamĀrama Āpitihanga
E rima ngā kaupae matua o roto i te pūnaha whakapeto torotika, ā, he nui te pūngao ka whakapaua i ia kaupae:
- Ko te huke. Arā, ko te tango, te unu, te kohikohi rānei i tētahi rawa taketake, pērā i te hinu, i te waro, me te onepū rino.
- Ko te waihanga. Koia ko te whakamahi i ērā rawa taketake hei waihanga i tētahi momo matū, pērā i te rino, i te kirihou, i te konumohe me te pepa. Ka whakamahia aua matū hei whakanao hautaonga, pērā i te pātara inu, i te motukā, i te kākahu me te pūrere tāhiko.
- Ko te tohatoha i aua hautaonga. Mātua rā te kawenga mā tētahi momo tūnuku, pērā i te wakarangi, i te taraka, me te kaipuke. Ka kawea ki ngā mākete, ki ngā pokapū tohatoha, ā, atu i reira ki ngā toa hei hoko mā te marea.
- Ko te whakapeto i te hautaonga. Hei tauira, ko te whakapau kōhinu i te motukā; ko te hoko pātara wai kirihou; ko te hoko waea pūkoro hou i ia tau; ko te whakapeto hiko hei whakamahana i te whare.
- Ko te porowhiu. Arā, ka porowhiua te hautaonga nā te kore e hiahiatia tonutia, nā te pakaru, nā te paunga rānei o tōna kaha. Ka porowhiua ki te taupuni hangarua, ki te taupuni taumanu rawa, ki te ruapara rānei, ka porowhiua taurekarekatia rānei.
Koia nei te pūnaha whakapeto torotika e kōrerohia nei:
Ko te mahi moni te whāinga matua i te pūnaha whakapeto torotika, waihoki ka noho te tokomaha hei kaimahi kia riro i te tokoiti te moni nui, mātua rā ko ngā rangatōpū whenuarau me ngā pakihi nui.
Ko te pūnaha whakapeto āmiomio te tauaro o te pūnaha torotika. He pūnaha tēnei e tino whai ana kia whakakorea te para me te parahanga; kia horapa te tukurautanga o ā tātou hautaonga me te taumanu rawa, e roa ai te wā toiora o aua hautaonga me aua rawa; kia whakarauoratia ngā pūnaha māori o te ao tūroa; kia hāpaitia ngā mōtika tangata pērā i ngā mōtika kaimahi; kia tōkeke anō te tuari o ngā hua e ora ai te katoa o tō tātou porihanga.