!
Welcome to PAEKUPU, words related to Te Marautanga o Aotearoa. Curriculum areas presently available on PAEKUPU: Toi Ataata, Te Reo Matatini, Puoro, Te Reo Pāngarau, Te Reo Pūtaiao, Ngā Mahi a te Rēhia, Hangarau, Tikanga ā-Iwi, Hauora
 
X
Hauora

rerenga ikura (wahine)

menstruation, period

tūingoa

WHAKAMĀRAMA

Ko te tuku toto o te wahine mai i tōna kōpū kia puta i tōna tara. He wāhanga tēnei o roto i tōna ikura ā-marama. Ka tupu te toto i te paetara o tōna kōpū, e taea ai te hapūtanga. Ki te kore e whakakikiria ōna kākano e te tātea o te tāne, ka rere te toto me ngā pūtau mate ki waho o tōna tinana.

The discharge of blood from a woman's uterus through the vagina, as part of the monthly menstrual cycle. Blood accumulates on the uterus walls in preparation for pregnancy. If the eggs are not fertilised by male sperm then the blood and dead cells are discharged from her body. 

Tauira KŌrero

I ētahi marama e nui ana te rerenga ikura, i ētahi marama e iti ana.

Ka tino ngaua ia ki te mamae o te puku parerori i te wā o tana rerenga ikura.

He mea nui kia whakaakona ā tātou kōhine kia tino mārama ki ngā āhuatanga o te rerenga ikura, tae atu ki ngā kōrero a ngā tīpuna mō te ikura wahine.

WhakamĀrama Āpitihanga

Tīmata ai te rerenga ikura o te wahine i tōna pūhuruhurutanga, ka kīia ko te kōhinetanga, ā, ka mutu i tōna taipakeke, ka kīia ko te ruahinetanga. Kāore hoki e rere i te wā e hapū ana ia. He rerekē te roa me te nui o te rerenga ikura o tēnā wahine, o tēnā wahine, tae atu ki te roa o te huringa i ia marama.

I te wā o te rerenga ikura, e toru ki te rima rā pea te roa, ka whakamahia e te wahine tētahi hanga hei hopu, hei miti rānei i te toto. Koia nei aua momo hanga:

  • Ko te ipu ikura. Hangaia ai ki te kirihou pīngore haumaru, ka whakaurua ki te tara hei hopu i te toto. Ka kī ana te ipu, ka whakapiakotia, ā, ka whakaurua anō, tae atu ki te mutunga o te rerenga ikura. Ka āta horoia, ā, ka whakamahia anō hei te rerenga ikura o muri atu. Ko tētahi painga o te ipu ikura, he tukurau te whakamahinga, kāore e tukuna ki te ruapara i muri i te mahinga kotahi:

  • Ko te kope ikura. I te wā o ngā tīpuna, whakamahia ai ngā momo tipu nei, te angiangi me te kuhukuhu. I ēnei wā nei, hangaia ai te kope ki te hanumitanga o te kātene, o te reiaku me te kirihou. Kāore e pōpopo te nuinga o ngā momo kope. Ka meatia te kope ki roto i ngā tarau roto o te wahine. Arā hoki te tarau ikura, he tarau roto, ko te kope tētahi wāhanga ōna:

Ki te kore e taea atu ēnei momo hanga, nā runga pea i te nui o te utu, ka kīia tērā ko te tuakoka ikura. Ko te hua o te tuakoka ikura, ko te whakamā, ko te kore o te wahine e puta ki waho i tōna kāinga, ko te tamō kura mēnā e kōhine tonu ana.

Mēnā ka paku māturu tonu te toto i te roanga atu o te marama, ka kīia tērā ko te māturu toto. He āhuatanga māori i ētahi wā, he māuiui rānei i ētahi wāhine. Ka ara ake i te momo ārai hapū e whakamahia ana, i te wā o te hapūtanga me te ruahinetanga, i tētahi pāmamaetanga, i tētahi mate paipai, i tētahi rongoā e kaingia ana, i te hē o te repe tenga, me ētahi take kē atu.

Ko te mate ikura takamua tētahi mate ka pā ki ētahi wāhine i ngā rā i mua i te rerenga ikura, ā, ka haere tonu i te wā o te ikura. Ko te māhunga ānini, ko te ngenge, ko te puku tetere, ko te manawa pā, ko te hēmanawa, ētahi o ngā tohumate.

Ka tino kōharihari ētahi wāhine i te wā o te rere ikura. Ko tētahi take o te kōharihari ikura, ko te puta o ētahi pūtautau kōpū ki waho i te kōpū, ki ngā wāhi pēnei i te wharekano me te tōngāmimi. Ka kīia tēnei mate, ko te heke pūtau kōpū.

KUPU KĒ ATU

mate wahine

ikura ā-marama

Tauira KŌrero

I ētahi marama e nui ana te rerenga ikura, i ētahi marama e iti ana.

Ka tino ngaua ia ki te mamae o te puku parerori i te wā o tana rerenga ikura.

He mea nui kia whakaakona ā tātou kōhine kia tino mārama ki ngā āhuatanga o te rerenga ikura, tae atu ki ngā kōrero a ngā tīpuna mō te ikura wahine.

WhakamĀrama Āpitihanga