WhakamĀrama Āpitihanga
Koia nei ētahi o ngā momo mate paipai:
- Ko te tona taihema. He mate huaketo ka pupū ake i te paehema o te wahine, o te tāne rānei:
- Ko te kutu taihema. He mate pirinoa. Ka noho ēnei kutu ki ngā huruhuru taihemahema o te tāne, o te wahine rānei. Ko te kaha ngau o te torotiti te tohumate:
- Ko te waihakihaki. He mate pirinoa hoki tēnei, ko te kaha ngau o te torotiti te tohumate, he hoipū ki te kiri, ki ngā wāhi maha o te tinana.
- Ko te pakiwhara. He mate ka pā ki ngā taihemahema o te tāne, o te wahine hoki. Ko te mamae ki te tuku mimi, ko te papī o te pirau i te ure, i te tara rānei ētahi o ngā tohumate o te pakiwhara. Ka whakawhitia ngā huakita o tēnei mate i te wā onioni.
- Ko te pākewakewa. He mate paipai horapa. Ka whekewheke ngā wāhi katoa o te tinana, ā, ka mate hoki pea ētahi wāhanga o te pūnaha arahau me te pūnaha ioio. Ka whakawhitia te pākewakewa mā roto i ngā wē taihemahema i te wā onioni.
- Ko te kōtureture. I ngā taihema wahine, ka tukuna he toto, he wē hoki i te tara, ka mamae te ai, te tuku mimi hoki. I te tāne, ka mamae te tuku mimi, ka papī mai he wē i te ure, ka pupuhi hoki ngā raho. I ētahi wā, ka noho ngū ki roto i te tangata mō te wā roa, kātahi ka pupū ake.
- Ko te pāpaka. Ka kakā te kiri nā runga i te pāngia ki tētahi huaketo. Ko te hoipū te putanga o te pāpaka ki ngā ngutu o te tangata (ko te pāpaka kanohi), ki ōna taihemahema rānei (ko te pāpaka taihema). Mā te pā o te kiri e whakawhitia ai te pāpaka mai i tētahi tangata ki tangata kē.
- Ko te mate ārai-kore. He mate huaketo ka kawea mā roto i ngā toto me ngā wē taihemahema, ā, mā te mahi a tēnei huaketo e tino ngoikore ai te pūnaha awhikiri o te tangata. Ka kīia te huaketo nei ko te wheori ārai-kore.
Mā te whai i ngā tikanga ai haumaru e āraitia atu ngā mate paipai, mātua rā ko te whakamahi pūkoro ure i te wā onioni.