WhakamĀrama Āpitihanga
Ko te kiritōpū te kupu tauaro o te kiritahi, arā, ko ngā āhuatanga e hāngai ana ki tētahi rōpū, pērā i te tuakiri me te ahurea o te rōpū, ngā whāinga a te rōpū, ngā mōtika me ngā haepapa o te rōpū.
Hei tauira ēnei o te whakamahinga o ēnei kupu e rua nei, te kiritahi me te kiritōpū:
- Ko ngā mōtika kiritahi me ngā mōtika kiritōpū. Ko te mana whakapūmau i te reo ūkaipō o tētahi iwi taketake hei tauira o te mōtika kiritōpū. Ko te manawhiri kōrero hei tauira o tētahi mōtika kiritahi.
- Ko ngā haepapa kiritahi me ngā haepapa kiritōpū. Hei tauira o te haepapa kiritōpū, ko tā te hapori tauawhi i te hunga tuakoka. Hei tauira o te haepapa kiritahi, ko tā te tangata whai kia iti tana tapuwae waro, kia matatika te āhua o tana noho ki tōna ao.
- Ko te tū kiritahi me te tū kiritōpū. Koia ko ngā mahi a te takitahi, a te rōpū rānei ki te kōkiri i tētahi kaupapa. Ko te aukati a te tangata i tana hoko kai e tākaitia ana ki te kirihou hei tauira o te tū kiritahi. Ko tā te hapori aukati i te pēke kirihou tukutahi hei tauira o te tū kiritōpū.
- Ko te kirimana tōtahi me te kirimana tōpū. Mā te tangata takitahi me tana kaituku mahi e whiriwhiri te kirimana tōtahi mō taua tangata rā. Mā te uniana me te kaituku mahi e whiriwhiri te kirimana tōpū mō ngā kaimahi katoa e hono ana ki taua uniana.
- Ko te kōwhiringa kiritahi me te kōwhiringa kiritōpū. Ka pā te mana kōwhiri nei o te takitahi, o te rōpū rānei ki ētahi āhuatanga pēnei i te reo kōrero, i te whakapau moni, i ngā momo kaupapa ka āta whāia. Ka whakatauria ēnei āhuatanga i runga anō i ngā uara, i ngā awhero o te tangata, o te rōpū rānei, me ngā hua tērā ka puta. Arā ētahi āhuatanga hei kōwhiri mā te kiritahi, pēnei i te tauonioni, i te ara mahi ka whāia me ngā momo kai ka kainga e ia. Mēnā he kōwhiringa kiritōpū, mā te whakawhitiwhiti kōrero me te tatūnga tukipū a te rōpū e tohu.