WhakamĀrama Āpitihanga
Koia nei ētahi āhuatanga ka āta arohia, ka mahia rānei i roto i te hopu oro:
- Mēnā he maha ngā reo taonga puoro e hopukina ana, ko te āhua o te tāmitimiti i tēnā me tēnā tētahi aronga matua. Ka āta arohia te taurite o ia reo, kia puta ai te āhua o te puoro e hiahiatia ana, pērā i te whakakaha ake pea i ngā taonga tāpatupatu. I ētahi wā pea ka whakahekea tētahi taonga puoro kia mārire ake, he wā anō ka whakapikia kia rarahi. He hononga motuhake tō ia taonga puoro ki te pūrere hopu oro, ka kīia ērā he arahono.
- Ko tētahi atu aronga i te tāmitimiti oro, ko te whakataurite. Koia ko te whakararahi, te whakamārire rānei i te whānui o ngā tangi, kia kaha ake ai ngā tangi mārū, ngā tangi tīkā rānei. Mēnā ka whakaitia te rerekē o te rarahi o ngā tangi mārū me ngā tangi tīkā, ka kīia tērā ko te hīnohi.
- Ka āta whāia kia tino iti te heihei o muri, kia ngangahu ngā oro e hopukina ana. Koirā te take ka āta purua ngā pātū o te taupuni hopu oro ki te matū ārai oro, pērā i te kirihou kōmāmā me te wūru.
- I te nuinga o te wā, ka hopukina kautia tētahi taonga puoro, ētahi rānei, ka waiho mō muri ngā whakarākeitanga me te tāpiri orotaunaki pērā i te papahū me te hohōtanga.
- Mēnā ka tāpiria he orotaunaki i te wā e hopukina ana te puoro, ka kīia tērā ko te hopu tukatuka. Arā, e tukatukatia ana ngā oro ka puta i ngā taonga puoro, pērā i te tāpiri papahū.
- Mēnā kāore e tino pai ana te hopuoro e whakamahia ana, tērā ka hua ake he momo tiotio, pērā i te tioro o te whakahuanga o te 't' i te reo Māori, me te 's' i te reo Pākehā. Kei ngā pūrere hopu oro te āheinga ki te whakamārire i aua tiotio, ka kīia ko te wetetiotio.
- Mēnā ka whakamahia he hopuoro arotītā, ka hopukina ngā oro mai i ōna taha katoa, huri amio. Mēnā he hopuoro arotahi, ka hopukina noa ihotia ngā oro mai i mua, kāore ngā oro o muri, o ngā taha rānei.
Mutu ana te tāmitimiti i ngā oro o ia arahono, ko te mahi whakamutunga he whakarite i te kōnae matua o te katoa o te puoro. Ka kīia tērā mahi ko te whakatakataka. Ko te kōnae matua te mea ka tāruaruatia hei tuku atu ki te marea hei kōpae, hei kōnae tuihono rānei.
Hei tauira tēnei o te hopu oro. Ka honoa ngā taonga puoro katoa ki te pūrere tāmitimiti oro, ki reira whakatauritehia ai, ki reira tāmitimitihia ai, kātahi ka tukuna ki te rorohiko, ki reira tiakina ai hei kōnae matihiko: