!
Welcome to PAEKUPU, words related to Te Marautanga o Aotearoa. Curriculum areas presently available on PAEKUPU: Toi Ataata, Te Reo Matatini, Puoro, Te Reo Pāngarau, Te Reo Pūtaiao, Ngā Mahi a te Rēhia, Hangarau, Tikanga ā-Iwi
 
X
Hangarau

hopunga

shot

tūingoa

WHAKAMĀRAMA

He āhuatanga matua o roto i te mahi waihanga ataata. Koia ko te wā e kā ana te kāmera, e hopu ana i ngā mahi e arumia ana, tae noa ki te whakawetonga o te kāmera. 

A basic element of movie making, specifically the time that the camera is rolling, capturing the action that is being followed, until the camera is turned off.

Tauira KŌrero

Kei uta tēnā hopunga e hoa mā!

Te roa hoki o tēnā hopunga.

E hia kē nei ngā tōaitanga o tēnā hopunga kia tika ai.

WhakamĀrama Āpitihanga

Ko ngā hopunga a te pū whakaahua ataata i mua i te mahi takatā, ka kīia he hopunga taketake, he haonga taketake rānei.

Arā kē ētahi momo hopunga e mahia nuitia ana i te ao mahi ataata. Koia nei ētahi:

  • Ko te hopunga waenga. Ka kitea tētahi haurua o te kaupapa, a runga, a raro rānei.
  • Ko te hopunga tata. Ka topa ki tata te kāmera kia āta kitea ai te kanohi o te tangata, mātua rā pea i te wā e kōrero ana ia.
  • Ko te hopunga piritata. Ka topa kia tino tata te kāmera, kia āta kitea ai ētahi mokamoka o te kaupapa, pērā i ngā karu o te tangata.

I tua atu i ēnei momo hopunga, ko te anga o te kāmera tētahi mea nui e rongo ai te kaimātakitaki i te wheako, i te kare ā-roto e hiahiatia ana e te ringatohu, e te kaihopu whakaahua rānei. Hei tauira o ētahi momo anga kāmera:

  • Ko te hopunga koki-rewa. Arā kei runga te kāmera i te kaupapa o te hopunga e tiro whakararo ana i tētahi koki tonu. Ko tā te hopunga koki-rewa, he whakaatu pea i te āmaimai o te tangata.
  • Ko te hopunga tūpā. I konei e noho tūpā ana te kāmera ki te kanohi o te tangata, e rongo ai te kaimātakitaki i te pono o te horopaki, inā e rite ana ki tā te tangata tiro ki te ao kei mua i a ia.
  • Ko te hopunga koki-hahaka. Arā, kei raro te kāmera i te kaupapa o te hopunga e tiro whakarunga ana. Mā konei pea e rongo ai te kaimātakitaki i te māia o te tangata.
  • Ko te hopunga pokohiwi. I konei ka whakaahuangia te kaupapa o te ataata mai i te pakihiwi o tangata kē e tiro atu ana ki a ia. Hei tauira:

I ētahi hopunga ataata, ka hūnukuhia te kāmera kia puta ai tētahi āhua. Koia nei ētahi hūnukuhanga kāmera e mahia nuitia ana:

  • Ko te honga i te kāmera, ki runga, ki raro rānei. Mā te honga e whākina ai tētahi āhuatanga ki runga ake, ki raro iho rānei i te kaupapa. He āhua rite ki tā te tangata tiro whakarunga, tiro whakararo rānei. Hei tauira:
  • Ko te kaurori whakataha i te kāmera, mauī ki te matau, matau ki te mauī rānei. Mā konei e kitea ai te horanuku e noho nei te kaupapa o te hopunga. Hei tauira:

  • Mēnā ka hūnukuhia te kāmera kia āta aru i te kaupapa o te ataata, ka kīia tērā he hopunga aruaru. Ākene pea ka hūnukuhia i runga tōneke, ka puritia rānei te kāmera ki te ringa o te kaihopu, ā, ko ia ka nuku haere. Ka kīia tērā he hopunga puriringa.

  • Mēnā e noho ana te kāmera ki te wāhi kotahi, kāore e hūnukuhia, ka kīia he hopunga tū tērā.

Ki te kore e rata te ringatohu, te kaihopu whakaahua rānei ki te hopunga, ka mahia anō. Ko ia hopunga ka kīia he tōaitanga. I te tīmatanga o ia tōaitanga ka meatia te papa tautuhi ki mua i te kāmera, e kitea ai ngā kōrero e pā ana ki te hopunga, pērā i te rā, i te wā, i te wāhi, i te ingoa o te ataata, i te ingoa o te ringatohu, i te nama o te tōaitanga. Hei tauira o te papa tautuhi:

I ētahi wā kāore te ringatohu e rata ki tētahi hopunga, nā te hapa, te hē rānei a ngā kiriwhakaari, a te kaihopu ataata rānei, ā, ka kataina taua hapa rā. Ka kīia ērā he hopunga whakakata. Ka tapahia atu ērā hopunga whakakata, engari i ētahi wā, ka whakaaturia i te mutunga o te ataata hei kata mā te hunga mātakitaki.

Ko tētahi pūkenga o te ringatohu, o te kaihopu ataata, he āta whakaaro ki te hanganga o te hopunga, arā, te noho kotahi mai o ngā āhuatanga pēnei i te kaupapa, i te horamuri, i te nekeneke o ngā kiriwhakaari, i ngā utauta, tae atu ki te āhua o te tūrama ki roto i te kapohanga.

Takenga Mai

hopu - to capture, catch

Tauira KŌrero

Kei uta tēnā hopunga e hoa mā!

Te roa hoki o tēnā hopunga.

E hia kē nei ngā tōaitanga o tēnā hopunga kia tika ai.

WhakamĀrama Āpitihanga