Hauora

tuakiri

identity

tūingoa

WHAKAMĀRAMA

Ko ngā āhuatanga o te tangata e kīia ai ia he tangata motuhake. Koia ko tōna whakapapa tonu, ko tōna ahurea, ko tōna reo ūkaipō, ko āna whanonga, ko ōna whakapono, ko ōna uara, ko āna tikanga, tae atu ki te āhua o tōna tinana. Ka pā hoki te tuakiri ki te rōpū, pērā i te tuakiri o tētahi iwi ake, o te hapori takatāpui, o te hunga turi, o te whenua tonu, otirā o te huhua ake o ngā momo whakarōpūtanga tāngata.

All aspects of a person which contribute to their uniqueness. This includes their lineage, their culture, their mother tongue, their behaviours, their beliefs, their values, their customs, and also their physical appearance. Identity also applies to groups such as the identity of a particular tribal group, of the gay community, of deaf people, of a whole country and myriad other groupings of people.

Tauira KŌrero

Ahakoa ngā piki me ngā heke i roto i ngā tau, ahakoa ngā tāmitanga, ka mau tonu i te iwi nei tō rātou ake tuakiri motuhake.

He kino kē te aukati atu a te ture o taua whenua rā i ngā āhuatanga tūturu o te tuakiri iwi taketake.

He tino kaha te hunga rā ki te whakanui i tō rātou tuakiri takatāpui.

WhakamĀrama Āpitihanga

Arā kē ngā whakapātanga o tēnei mea te tuakiri. Koia nei ētahi:

  • Ko te tuakiri whaiaro. Ko ngā whakaaro o te tangata ki a ia anō, ka whanake haere i roto i te takanga o te wā. Karekau he whiriwhiringa a te tangata ki ētahi āhuatanga o tōna tuakiri whaiaro, pērā i te wāhi i tipu ai ia, i tōna reo ūkaipō, i te tae o tōna kiri, otirā i ngā tuku ihotanga o roto i ana kāwai whakapapa. Arā hoki ētahi āhuatanga ka kōwhiria e te tangata, pērā i ngā rōpū ka tūhono atu ia, ōna kākahu, āna mahi ā-rehia, āna whanonga me ōna whakapono. Ka whanake haere, ka panoni haere ētahi āhuatanga o te tuakiri whaiaro i te takanga o te wā e ora ana te tangata.
  • Mēnā ka rangirua, ka pōkaikaha te tangata ki a ia anō, ki tōna tuakiri whaiaro, ki tana tū i tōna anō ao, nā runga pea i āna pahekoheko ki tangata kē, nā tētahi panonitanga matua i tōna ao, nā ngā awenga pāhopori, nā take kē atu rānei, ka kīia tērā he tairaru tuakiri, he mate tuakiri rānei. I ētahi wā, he take tēnei ka kōtonga te tangata.
  • Ko te tuakiri ā-iwi. Koia ko ngā āhuatanga ake o tētahi iwi, pērā i ngā kōrero tuku iho, i ngā waiata, i ngā tikanga, i te reo ake me tōna mita, waihoki ko ngā āhuatanga o tōna tauwāhi matawhenua, pērā i ngā maunga, i ngā awa, i ngā moana, mēnā he iwi noho takutai, he noho tuawhenua rānei.
  • Ko te tuakiri ahurea. Ko ngā tikanga, ko ngā reo, ko ngā uara, ko ngā whakapono e hāngai ana ki tētahi rōpū pāpori, pērā i te hapū, i te hapori, i tētahi kura, i tētahi tauwāhi matawhenua, i te whenua whānui rānei.
  • Ko te tuakiri ā-ira. Ko tā te tangata rongo, tāna whakaputa i tōna wahinetanga, i tōna tānetanga, i tōna ira kētanga rānei.
  • Ko te tuakiri ā-whenua. Ko ngā āhuatanga e aroā whānuitia ana e ngā iwi noho o tētahi whenua, e tū motuhake ai rātou ina whakatairitea ki whenua kē. Ka whai wāhi atu ko te āhua o te/ngā reo o te whenua, ko ngā āhuatanga o te taiao, ko te hītori o te whenua, ko ngā ahurea o ngā iwi noho ki taua whenua hoki.

Tauira KŌrero

Ahakoa ngā piki me ngā heke i roto i ngā tau, ahakoa ngā tāmitanga, ka mau tonu i te iwi nei tō rātou ake tuakiri motuhake.

He kino kē te aukati atu a te ture o taua whenua rā i ngā āhuatanga tūturu o te tuakiri iwi taketake.

He tino kaha te hunga rā ki te whakanui i tō rātou tuakiri takatāpui.

WhakamĀrama Āpitihanga