tuakiri ā-ira

WhakamĀrama Āpitihanga

Koia nei ētahi kupu e hāngai ana ki ngā momo tuakiri ā-ira:

• Ko te irawhiti. He karangatanga whānui mō te hunga kua rerekē tō rātou ira, i tērā i whakatauria e tō rātou whānau, e tō rātou ahurea i te wā i whānau mai ai hei wahine, hei tāne rānei.
• Ko te irahuhua. He āhua rite ki tō runga nei, he kupu whānui mō te hunga e rerekē ana tō rātou ira me te whakaputanga o taua iratanga, i ngā ritenga pāpori o te porihanga auraki.
• Ko te irakē. He karangatanga whānui mō te hunga kei waho atu o te ira tāhūrua, arā, te wahine me te tāne.
• Ko te irapūmau. He tapanga mō te hunga e rite tonu nei te ira ki tērā i whānau mai ai rātou.
• Ko te irarere. Hei whakaahua i te hunga ka rerekē tō rātou ira me te whakapuaki iratanga i te takanga o te wā.
• Ko te irakore. Kāore tēnei hunga e whai ana i tētahi iratanga.
• Ko te ira tāhūrua. He whakarōpūtanga ā-ira ki ngā rōpū e rua nei, te wahine me te tāne.
• Ko te ira tāhūrua-kore. Hei whakaahua i te hunga kāore e noho pūmau ana ki raro i ngā ira tāhūrua nei te wahine me te tāne. Kei waenganui pea i te wahine me te tāne, kei waho kē atu rānei. He karangatanga whānui e uhi ana i te irakore, i te irarere, i te irakē me te irahuhua.
• Ko te ira koiora. Hei whakamārama i te āhua o ō tātou tinana, mātua rā ko te taihemahema o te wahine me ō te tāne. Ko te taihemarua te kupu mēnā kāore e taka ngā āhuatanga taihema o te tangata ki raro i ērā o te ira koiora. Arā, he rerekē ō rātou āhuatanga ā-ira koiora i te wahine me te tāne noa iho.

Ko te hapori āniwaniwa hei kupu whānui mō ngā tāngata he kanorau ō rātou aronga hōkaka, he kanorau anō ō rātou tuakiri ā-ira.

Ko te whākinga, koia tā te tangata whakanui i tōna tuakiri ā-ira, me tana whakaputa i taua tuakiri ā-ira ki te ao. I ētahi wāhi, i ētahi ahurea, i ētahi whānau he āhuatanga uaua, inarā he rerekē i ō te nuinga i ērā wāhi, i ērā ahurea, i ērā whānau, ā, ka whakaparahakotia, ka whakahāweatia pea te tangata e whāki ana.

Mēnā e anipā ana, e manawarau ana te tangata ki tōna ira whānau mai, ka kīia tērā ko te auhi ā-ira. Kāore e tau ana ngā whakaaro o te tangata ki te taupatupatu o te āhua o tōna tinana me tōna tuakiri ā-ira. Tērā pea ka whai te tangata i tētahi ara whakawhiti e huri ai te āhua o tōna tinana kia rite ki tōna tuakiri ā-ira. Ko ētahi kōwhiringa haumanu ā-ira hei āwhina i te tangata e pākia ana ki te auhi ā-ira:

• Ko te whakawhiti kōrero me tētahi kaitohuora, irā te kōrero 'he ora kei te kupu'.
• Ko te kai i ngā momo rongoā taiaki hei whakakaha hei whakaiti rānei i te taiaki uwha, i te taiaki tāne rānei.
• Ko te poka, e pūmau ai te panoni i te āhua o te tinana, pērā i te hāpara uma me te hāpara taihema.

Nō te tau 2022 i mana ai tētahi ture i Aotearoa hei aukati i te takahuri hōkakatanga. Kāore e whakaaetia i raro i te ture te mahi a tētahi ki te takahuri i te hōkakatanga, i te tuakiri ā-ira rānei o tētahi atu, ahakoa mātua, ahakoa tūngaio hauora rānei.