para

WhakamĀrama Āpitihanga

He maha ngā momo para. Koia nei ētahi:

• Ko te para ahumahi. Ko ngā para ka puta i ngā momo ahumahi, pērā i te auahi me te hauhā ka tukuna ki te kōhauhau.
• Ko te para tāhiko, te īpara rānei. Ko ngā pūrere hiko kāore e hiahiatia ana, kāore e taea ōna waehanga te whakamahi anō, te hangarua rānei. He para tāoke te īpara nā te mea he tāoke ngā konganuku pērā i te konuoi, i te konumatā me te konuhirimā. Ka tino whakamahia ēnei matū i roto i ngā pūrere tāhiko, ā, he kino te pāpā atu ki te hauora o te taiao, o te tangata anō hoki.
• Ko te para hangahanga. Ko ngā para ka puta i te mahi hanga whare, pērā i te papa rākau, i te maitai me te pereki.
• Ko te para haurehu. Ko ngā haurehu me ngā korakora para e kawea ana i te hau takiwā, pērā i te puehu me te auahi.
• Ko te para mōrearea. Koia nei ngā para ka patu i te hauora o te tangata, ka whakakino rānei i te taiao. Hei tauira, ko te toenga peita.
• Ko te pararopi. Ko ngā para ka takea mai i ngā tipu, i ngā kararehe rānei, ā, ka pōpopo i te mahi a te noke me ētahi atu rauropi. Hei tauira, ko te para kai, ko te para tipu.
• Ko te pararopi-kore. Ko ngā momo para kāore e pōpopo, pērā i te konumohe.
• Ko te para totoka. He totoka te nuinga o ngā para. Hei tauira, ko te kirihou, te konganuku, te taputapu hiko me te para kai.
• Ko te para tauhokohoko. Ko ngā para ka puta i te mahi tauhokohoko, pērā i te pepa me ngā momo tākai, ka kīia he para tākai.
• Ko te para wē. Ko ngā momo wē ka noho hei para, pērā i te hinu ka whiua i ngā wāhi whakatika motukā me ngā whare tunu kai.
• Ko te para ahuwhenua. Hei tauira, ko te tākai hei, te ipu paturiha me te kai e pōpopo ana.
• Ko te para kāinga. Koia ko te momo para ka whakaputaina i te kāinga. Ko tētahi ratonga ka whakahaerehia e te kaunihera i te tāone, ko te kohinga taparori i ia wiki hei kohi i te para kāinga o tēnā whare, o tēnā whare.
• Ko te para kerakera. He momo para totoka, he matū pararopi kei roto, ka pōpopo ā tōna wā. Hei tauira, ko te whēkau kararehe me te para kai. Ki te kore e tika te whakawairākau i te para kerakera, ka haunga, waihoki ka whakamōrea hoki i te hauora o te tangata.
• Ko te para motuhake. He momo para me āta porowhiu, ina he tino mōrearea, he tapu, he uaua rānei te porowhiu. Hei tauira ko te para poka, ko te one tāoke, ko te tēpoko, ko te para matū hoki.