papatono

WhakamĀrama Āpitihanga

Ko ētahi tauira o ngā papatono e mōhio whānuitia ana:

• Ko ngā papatono pūtirotiro tukutuku pērā i te Chrome me te Firefox.
• Ko te tōpūtanga papatono o Microsoft Office. E whai wāhi atu ana te papatono tukatuka kupu, te papatono ripanga me ētahi atu.
• Ko ngā momo papatono whakawhiti kōrero ā-ipurangi, pērā i te Skype.
• Ko ngā kēmu rorohiko.

Ka puritia ngā kōnae papatono ki te pukumārō o te rorohiko. Ina tonoa e te kaiwhakamahi kia mahia tētahi mahi, ka pānuihia e te rorohiko ngā tohutohu kei te kōnae, kātahi ka whai i aua tohutohu.

Ka tuhia e te kaihanga papatono ngā tohutohu ki roto i tētahi reo papatono, pērā i te Java, i te Pascal me te BASIC, ka whakamahia ngā waehere o roto i te reo. Hei tauira, ko te reo kuputoro (HTML). Ko tā te papatono whakahiato, he huri i te tuhinga waehere hei reo tāhūrua, koirā te reo e mārama ana ki te rorohiko. Arā, mā te whakahiato ka taea e i te rorohiko te papatono te pānui me te urupare anō ki ngā tono.

He momo papatono te taupānga. Ko te paku rerekētanga ka waihangatia te taupānga mā te kaiwhakamahi, e taea ai e ia tētahi kōtuinga mahi te whakatutuki.

He kupu whānui te pūmanawa, ka kapi i a ia te papatono, te taupānga me ngā pūnaha whakahaere katoa ka whakamahia e te rorohiko. Ko te tauaro o te pūmanawa, ko te pūmārō, arā, ko ngā pūrere ake. He mea ōkiko te pūmārō, ka taea te whāwhā e te ringa. Kāore te ringa e pā ki te pūmanawa.