WhakamĀrama Āpitihanga
He āhuatanga matua te aroā weteoro me te mātauranga oromotu e matatau ai te ākonga ki te pānui ā tōna wā.
Hei tauira o te aroā weteoro:
- Ka rangona te huarite o ētahi kupu, pērā i te ‘wai’ me te ‘tai’.
- Ka rangona te oro rite o te tīmatanga o ētahi kupu, pēnei i te ‘karu’ me te ‘kahurangi’.
- Ka rangona ngā kūoro takitahi o roto i te kupu, ā, ka āhei ki te papaki ringaringa mō ia kūoro. Arā, e whā ngā papaki ringaringa i te wā e whakahuatia ana te kupu ‘tukutuku’.
Hei tauira o te mātauranga oromotu:
- Ko te mōhio ki te arapū o te reo me te whakahua anō i ngā pū.
- Ko te mōhio he oropuare te pū whakamutunga o ngā kūoro katoa o te reo Māori.
- Ko te mōhio ki te mahi a te tohutō.
Ko te aroā oromotu tētahi wāhanga o roto i te aroā weteoro. Arā, ko tā te tangata rongo, tāna tautohu hoki i ngā oro takitahi o te reo. Koia ko ngā oro e hāngai ana ki ngā pū o te reo. Ko tana mōhio hoki ki te whakaeminga o ngā oro hei hanga kupu. Hei tauira, e whā ngā oromotu o te kupu ‘paku’ – ko ērā e hāngai ana ki te ‘p’, te ‘a’, te ‘k’ me te ‘u’, ā, ki te noho kotahi mai ēnei oro, ka hua ko te kupu ‘paku’.
