WhakamĀrama Āpitihanga
I roto i te ōhanga tauhoko herekore, kāore e whawhea e te kāwanatanga ngā ānga mākete hei whakamāmā i ngā utu. Engari mēnā ka tino piki te utu mō ētahi momo hautaonga e matea nuitia ana e te iwi, mā te whawhenga kāwanatanga aua utu e whakamāmā. Hei tauira, ka whakakorea pea te Tāke Hokohoko i te miraka kia māmā ake ai te utu.
He wā anō ka whawhea e te kāwanatanga ngā ānga mākete hei whakaū, hei whakakaha rānei i tētahi kaupapa. Hei tauira, ka whakapikia te tāke kōhinu, ā, ka hoatu he pūtea āwhina mō te hoko motukā hiko. Mā konei e whakaitia ai te tahu koranehe me te tukuna o te hauhā ki te kōhauhau nā te mea ka whakaitia te hokona o te motukā kōhinu, ā, ka whakapikia te hokona o te motukā hiko.
Hei whakaahua i te taunekeneke o ēnei mea e rua, te whakarato me te popono, he āhuatanga matua o te ānga mākete:
Mēnā he nui ake te whakaratonga o te hautaonga i te popono ki taua hautaonga, ka kīia he whakaratonga tuhene tērā, ā, ko te hemihemi o aua hautaonga te hua, ka mutu, ka heke te utu.
Mēnā he kaha ake te popono ki te hautaonga i te whakaratonga, ka kīia he popono tuhene tērā, ko te kōpaka o aua hautaonga te hua, ā, ka piki te utu.