whiwhi painga

WhakamĀrama Āpitihanga

Koia nei ētahi momo whiwhi painga e kōrerotia nuitia ana:

• Ko te whiwhi painga kirimā. E tino kitea ana i ngā whenua ko te hunga kirimā te iwi awenui, te iwi e whai mana ana i roto i ngā whakahaere. Kāore e tino kitea ana te ahurea o iwi kē i roto i ngā āhuatanga o ia rā.
• Ko te whiwhi painga hāhi. I konei ka whakanuia tētahi whakapono i roto i te porihanga auraki, kāore ētahi atu. I Aotearoa he rā hararei ngā rā nui o te hāhi Karaitiana, pērā i te Aranga me te Kirihimete. Hei tauira tērā o te whiwhi painga o te whakapono Karaitiana.
• Ko te whiwhi painga ā-ira, mātua rā ko te whiwhi painga o te hunga tāne i runga ake i te wahine. Hei tauira, i roto i te ao mahi he māmā ake tā te tāne uru atu ki ētahi tūranga mahi, tana eke i ngā taumata o te ao mahi, he nui ake te utu ka riro i te hunga tāne.
• Ko te whiwhi painga taearo, arā, e tino kitea ana, e whakanuia ana te taearotanga, kāore ētahi hōkakatanga kē atu. Ka mataku tonu pea, ka āmaimai tonu pea, te hapori āniwaniwa ki te whakaatu i tō rātou hōkakatanga, ka mutu ka whakahāweatia rātou i ngā wāhi maha o te porihanga, pērā i te tono rīhi whare.
• Ko te whiwhi painga ohapori. Koia ko ngā painga ka riro i te tangata mēnā he moni āna, ā tōna whānau rānei hei utu i te whai wāhitanga atu ki ngā mea maha o roto i te porihanga, pērā i te mātauranga me te rēhia.

Ko te rawakore te tauarotanga o te whiwhi painga, arā, ko te noho o te tangata ki te tūranga ohapori hahaka, ko te kore o ngā arawātea hei whaitanga māna, me te uaua anō o te whiwhi i ngā mea e matea nuitia ana.