WhakamĀrama Āpitihanga
He maha ngā painga o te kori hiki tinana, e pakari ake ai ngā uaua, e kaha ake ai, e matatū ake ai, e tere ake ai, e hangore ake ai, e reretahi ake ai, e taurite ake ai te tinana o te tangata.
Koia nei ētahi o ngā momo kori hiki tinana e mōhio whānuitia ana:
| Ko te pana ake. Kia puritia te tinana ki runga i ngā ringaringa me ngā waewae ki runga ake i te papa, he torotika mai i te upoko ki ngā rekereke. Ka āta tukua te tinana ki raro kia pātata te poho ki te papa. Ka paku puritia, kātahi ka panaia whakarunga. |   |
| Ko te puri whakapae. He āhua rite ki te tīmatanga o te pana ake i runga nei, engari me pā ko ngā tuke ki te papa, ā, ka puritia te tinana ki konā mō tētahi wā, pērā i te meneti kotahi. He pai hei whakapakari i ngā uatumu. |  |
| Ko te puri kaokao. He rite ki tō runga nei, ki te puri whakapae, engari e takoto whakatetaha ana te tinana, ko tētahi waewae ki runga i tētahi, ko te tuke ki raro i te pokohiwi hei pupuri i te tinana ki runga ake i te papa. Ka pupuri kia torotika te tinana. |  |
| Ko te pāpi. Ka tū, ko ngā ringaringa ki ngā taha. Ka heke whakararo kia kuparu te tinana. Ka meatia ngā ringaringa ki te papa, ā, ka hūpeke whakamuri ngā waewae kia takoto whakapae te tinana ki runga i ngā ringaringa me ngā waewae. Ka whakaotia he pana ake, ka hūpeke whakamua ngā waewae kia kuparu anō, kātahi ka peke whakarunga kia tū anō te tinana. He kori ā-hāora tēnei. |  |
| Ko te piki maunga. Ka puri whakapae i te tinana, ā, ka hohoko te nuku whakamua o ngā turi, ānō nei e oma ana. He kori ā-hāora tēnei. |   |
| Ko te kuparu. Ka tū, kātahi ka piko whakararo te tinana kia noho tītengi ai, ānō nei e noho ana ki tētahi tūru. Ka paku puritia, kātahi ka āta tū kia torotika anō ai te tinana. |  |
| Ko te waetīkei. Ka tū me te mau o ngā ringaringa ki ngā hope. Ka tīkei whakamua tētahi waewae me te heke whakararo o te tinana kia pātata atu te turi o muri ki te papa. Ka tū torotika tonu te tumu. Ka paku puritia ki reira, kātahi ka tīkeitia whakamuri kia tū anō ai te tinana. |  |
| Ko te arawhiti. Ka takoto, ko te tuarā ki te papa, ko ngā ringaringa ki te taha. Ka whakapikoa ngā turi, ā, ka hīkina ake te tuarā me ngā hope. Ka puritia ki reira, kātahi ka āta tukua te tinana kia takoto anō ai ki te papa. |  |
| Ko te kumerunga. Ka toro atu i ngā ringaringa ki te pupuri i tētahi kaho ki runga ake i te māhunga. Ka kumea ake te tinana, ka paku puritia, kātahi ka āta tukua ki raro. |   |
| Ko te tukupoto uatoru. Ka toro whakamuri i ngā ringaringa ki te pupuri i ngā tapa o tētahi tūru. Ko ngā waewae ki mua i te tūru, ko ngā rekereke ki te papa. Ka āta whakahekea te tou ki te papa kia koki hāngai ngā tuke. Kātahi ka pana whakarunga kia torotika anō ai ngā ringaringa. |  |
| Ko te nohotū. Ka takoto ki te papa me te piko o ngā turi, ko ngā raparapa waewae ki te papa. Ka puritia ngā ringaringa ki muri i te māhunga, ka hīkina te tumu kia nohotū te tinana. Ka paku puritia ki reira, kātahi ka āta whakahokia te tinana ki te papa. |   |