haumi ~tanga

WhakamĀrama Āpitihanga

Arā ētahi momo haumitanga hei whakatipu mā te tangata i āna moni. Koia nei ētahi:

• Ko te pūtea haumi. Ka tukuna he moni hei pupuri mā te pēke mō tētahi wā, hei haumi, hei whakatipu mā rātou. Ka tāpiria haerehia he huamoni ki te pūtea i te takanga o te wā haumi.
• Ko te mākete pānga. I konei ka hokona he wāhanga o tētahi pakihi, ka kīia he pānga o taua pakihi rā. Mēnā ka piki te wāriu o te pakihi, ka piki anō te wāriu o te pānga a te kaihaumi, ā, ka tipu tana tahua haumi. Arā hoki te tūraru haumitanga o tēnei momo. Mēnā ka heke te wāriu o te pakihi, ka heke anō te wāriu o te tahua haumi.
• Ko te mākete whare, ka kīia hoki he haumitanga papanoho. Ka hokona he whare, he whenua rānei i runga i te tūmanako ka piki te wāriu o taua whare i te takanga o te wā.

Ko tētahi atu huarahi e haumi moni ai te tangata takitahi, ko te tuku i tana moni ki tētahi kaiwhakahaere haumitanga. Ka whakatauria te kāhua haumi a te tangata, pērā i te roa o te haumitanga me te nui o te tūraru e pai ana ki a ia. Kātahi ka whakaritea he mahere haumi hei whakaaetanga mā te tangata. He maha pea ngā momo haumitanga o roto i te mahere, pērā i te tuku i tētahi wāhanga o te moni ki te pēke, i te hoko pānga ki ētahi pakihi maha, me te haumi anō ki te mākete whare. Ka kīia tērā ko te whakakanorautanga, ā, mā reira e whakaitia ai ngā tūraru haumitanga.

Ko te haumitanga matatika, koirā te tuku i ngā moni haumi ki ngā momo kaupapa, ki ngā momo pakihi e toitū ana, e matatika ana ā rātou mahi, kāore e takakinohia he tangata, he taiao rānei. I konei ka aukatia pea te haumi moni ki te ahumahi hinu, te ahumahi hanga pū, te ahumahi petipeti me te ahumahi waipiro.

I mua i tā te tangata tuku i āna moni ki tētahi momo haumitanga, e tika ana kia āta tirohia e ia ngā tūraru katoa tērā pea ka hua ake, otirā ngā taha katoa o te kirimana haumi. Ka kīia tērā ko te haurapatanga.