WhakamĀrama Āpitihanga
Hei whakaatu i ngā momo utu i roto i te ao tauhokohoko:
Ko ngā utu whakahaere tētahi wāhanga o roto i te utu waihanga, i te utu hokorau, i te utu kaihoko hoki, arā, ko te rīhi whare, ko te utu i te hiko me ērā atu tū āhuatanga. Ka tāpiria he whakapikinga utu ki te utu waihanga hei monihua mā te kaihanga. Ko tā te kaihokorau, he hoko, he whakaputu i ētahi hautaonga maha, hei hoko atu anō ki ngā toa. Ka tāpiria e ia tāna whakapikinga utu hei monihua māna. Ko tā te toa, he hoko atu i te hautaonga ki te marea me te tāpiri anō i tāna whakapikinga utu hei monihua māna.
Ko te hoko harangote tētahi whakaritenga i waenga i te kaihoko me te tangata, te toa, te pakihi rānei e hoko atu ana i tētahi hautaonga, i tētahi ratonga rānei. I konei ka utua tētahi ōrau o te utu (pērā i te 40%) kia riro i te kaihoko te hautaonga e hokona ana. I muri mai e noho kirimana ana ia ki te tuku utu anō i ia wiki pea, i ia marama rānei, kia utua rā anōtia te katoa o te utu mō te hautaonga me te huamoni ka tāpiria atu. Ka kīia te whakaritenga he mahere utu harangote, ā, ko ia utunga he utu harangote.
E āhua rite ana te hoko tāpui, engari kāore e riro i te kaihoko te hautaonga e hokona ana kia utua rā anōtia e ia te katoa o te utu mō te hautaonga. Mō te hoko harangote me te hoko tāpui, ko te wāhanga o te utu ka utua i te tuatahi ka kīia ko te moni tāpui. Mā te tuku i te utu tāpui e mana ai te hokonga.
I ētahi wā, ko tā te kaihoko atu he whakaheke i te utu mō te hautaonga, mō te ratonga rānei e hoko atu ana ia. Ka kīia tērā ko te whakahekenga utu, ā, ko te take, kia maha ake ngā hokonga o taua hautaonga, o taua ratonga rānei. Ko te monihoki tētahi atu ara hei whakamāmā i te utu mō tētahi hautaonga, ratonga rānei, hei whakapiki hoki i te maha o ngā hokonga. He momo whakahokinga moni, ina he wāhanga o te utu ka whakahokia ā tētahi wā mēnā ka tutuki i te kaihoko tētahi whakaritenga. Hei tauira, ka riro pea he monihoki mēnā ka utua te nama i mua i tētahi rā, mēnā rānei ka eke ki tua atu i te 100 ngā hokonga o tētahi hautaonga i te roanga atu o tētahi wā, pērā i te kotahi tau.