!
Welcome to PAEKUPU, words related to Te Marautanga o Aotearoa. Curriculum areas presently available on PAEKUPU: Toi Ataata, Te Reo Matatini, Puoro, Te Reo Pāngarau, Te Reo Pūtaiao, Ngā Mahi a te Rēhia, Hangarau, Tikanga ā-Iwi, Hauora
 
X
Hauora

taiohi ~nga

adolescent, adolescence, youth

tūingoa, tūmahi poro, tūāhua

WHAKAMĀRAMA

Ko te wā e whanake ai te tangata, ōna taha katoa, mai i te tamariki ki te pakeke. Ko taua hunga hoki kei tēnei pae whanake.

The time when a person matures in all of their aspects, and moves from childhood toward becoming an adult. It also refers to the group of people who are at this stage of development.

Tauira KŌrero

Mō ētahi, he wā pōkaikaha te taiohinga, nō reira me kaha tonu te tauawhi a te whānau.

Nōna e taiohi tonu ana, ka tahuri ia ki te ako whakapapa i te taha o ōna kaumātua.

Me tuku te taiohi ki te tūhura i tōna ake tuakiritanga, engari me āta tauawhi tonu.

WhakamĀrama Āpitihanga

He nui ngā taha o te taiohinga, tae atu ki ngā whanaketanga, ngā panonitanga me ngā wero ka ara ake i tēnei wā . Koia nei ētahi:

  • Ko te whanake tinana. Mātua rā ko te pūhuruhurutanga, arā, ka tipu ngā taihemahema e whakaputa uri ai ā tōna wā. Ko te kōpū me te wharekano o te taitamāhine ērā, ka ōna hope me ōna ū, tae atu ki te tipu o ōna puke, me ngā huruhuru i ōna kaokao. I te taiohinga ka tīmata hoki te rerenga ikura o te kōhine. I te taitama, ko te tipu me te taka o ōna raho, ko te rahi haere o tōna ure me tana āhei ki te tuha, ko te mārū o tōna reo, tae atu ki te tipu o ngā huruhuru ki tōna tinana, mātua rā ki tōna kanohi, ki ōna kaokao, ki tōna paehema hoki. I tua atu i ērā whanaketanga ka tino tāroaroa te tipu o te tinana.
  • Ko te whanake kare ā-roto. Ka taurangi, ka piki, ka heke, ka rīrā ngā kare ā-roto me ngā piropiro o te hunga taiohi. He uruparenga ki ngā panonitanga ā-tinana, ki ngā panonitanga taera, hōkakatanga hoki e pupū ake ana. He uruparenga hoki ki ngā nekeneke o roto i tōna ao, me te kore e mārama ā-hinengaro nei ki ēnei nekenekehanga me ēnei panonitanga. Ko te kiritau tērā o te taiohi, ka piki, ka heke i runga i tōna hopo ki ngā panonitanga ā-tinana e haere ana i tēnei wā. Ka kaha pea ngā piropiro hurihuri o te taiohi. He mea nui te akoako mātua me te tauawhi a te whānau hei whakamauru i ngā kare ā-roto, engari i ētahi wā, ka parea ērā e te taiohi.
  • Ko te whanake hirikapo. Ka pakari haere tōna whakaaro tūrehurehu me tōna whakaaro arorau, e hanga māramatanga ai ia ki tōna ao, e piki ai ōna pūkenga whakatatū, me tōna āhei ki te whakatau i te ara, i te kōwhiringa e tika ana mōna. Ko tētahi āhuatanga ka kitea i ētahi taiohi, ko te mātātoatanga, me te kore e aro ki ngā tūraru o roto i tētahi pūāhuatanga. He wā hoki tēnei ka ara ake te wairua tautohe ki ōna mātua, ki ētahi āhuatanga o te porihanga, otirā ki ngā mea ka whakatau mana ki runga i a ia.
  • Ko te whanake taihema. Ka whakauruuru ngā āhuatanga tinana, āhuatanga kare ā-roto, āhuatanga hinengaro hoki o te taiohi, ā, ka pupū ake ko te hia ai, ko te hiahia ki te hononga taupiri, whaiāipo hoki.
  • Ko te whanake hōkakatanga. Ka puta haere tēnei āhuatanga o te tangata i tōna taiohinga, arā, ka mate kanehe ki tēhea ira, ki ngā ira e rua, ki irakē rānei. He wāhanga tēnei o te tuakiri o te tangata ka puta haere i tēnei wā.
  • Ko te whanake tahapori. Ka tū tangata haere te taiohi i tōna ake mana tangata, ka kore e pērā rawa tana whakawhirinaki ki ōna mātua, ka kaha ake pea te awenga aropā me ngā awenga o te porihanga whānui.

Tauira KŌrero

Mō ētahi, he wā pōkaikaha te taiohinga, nō reira me kaha tonu te tauawhi a te whānau.

Nōna e taiohi tonu ana, ka tahuri ia ki te ako whakapapa i te taha o ōna kaumātua.

Me tuku te taiohi ki te tūhura i tōna ake tuakiritanga, engari me āta tauawhi tonu.

WhakamĀrama Āpitihanga