WhakamĀrama Āpitihanga
Nō te taenga mai a tauiwi ki Aotearoa, ka whakatōkia ā rātou tikanga tātāmi mō tēnei mea te ikura wahine, arā, ka kīia he mate ('mate wahine'), he paru, nō reira me huna. Ko tā ngā tīpuna, he wā whakaora anō, he wā whakamahea, he wā kia maimoatia te wahine e tōna whānau.
I te wā o te ikura, e toru ki te rima rā pea te roa, ka whakamahia e te wahine tētahi hanga ikura hei hopu, hei pupuri rānei i ōna toto. Koia nei aua momo hanga:
- Ko te ipu ikura (kapu ikura), ko te kōpae ikura rānei. Hangaia ai ki te kirihou pīngore haumaru, ā, ka whakaurua ki te tara hei hopu i ngā toto. Ka kī ana te ipu, te kōpae rānei, ka whakapiakotia, ā, ka whakaurua anō, tae atu ki te mutunga o te rerenga ikura. Ka āta horoia, ā, ka whakamahia anō hei te rerenga ikura o muri mai. Ko tētahi painga o ēnei hanga ikura, he tukurau te whakamahinga, kāore e tukuna ki te ruapara i muri i te mahinga kotahi:
- Ko te puru taiawa. Hangaia ai ki te kātene, ki te reiaku, ki ēnei mea e rua rānei. Ka kuhuna ki roto i te tara, ā, ko tāna, he miti i ngā toto. He hanga mahinga tukutahi, ko te nuinga kāore e ngāwherewhere, kāore e pōpopo. Ko te ruapara te otinga atu, kāore e tika ana kia ākiria atu i te heketua, kei purutiti ngā paipa:
- Ko te kope ikura. I te wā o ngā tīpuna, whakamahia ai ngā momo tipu nei, te angiangi, te pūngorungoru me te kohukohu, koia hei miti i ngā toto. He tukutahi ētahi o ngā kope ikura o ēnei wā nei, he tukurau ētahi. Hangaia ai te kope ikura tukutahi ki te hanumitanga o te kātene, o te reiaku whakakōmā me te kirihou. Kāore ērā e pōpopo. Hangaia ai te kope ikura tukurau ki te matū tupumāori pērā i te kātene me te pamupū, ā, ka pai noa iho te pōpopo o ērā. Ko ētahi wāhine ka whakamahi i te tāweru noa iho, arā, he papanga hei miti i ngā toto. Ka meatia te kope, te tāweru rānei ki roto i ngā tarau roto o te wahine:
- Ko te tarau ikura, arā, he tarau roto, ko te kope tētahi wāhanga ōna:
Ki te kore e taea atu e te wahine ēnei momo hanga, nā runga pea i te nui o te utu, ka kīia tērā ko te tuakoka ikura. Ko ētahi hua o te tuakoka ikura, ko te whakamā, ko te kore o te wahine e puta ki waho i tōna kāinga, ko te tamō kura mēnā e kōhine tonu ana.