WhakamĀrama Āpitihanga
Mā te tākai i te kikopuku ki tētahi tauri whakamakoha me te papu hau ki roto, e inea ai te pēhanga toto o te tangata:
Me he kaha te pēhanga o ngā toto, ka kīia tērā ko te toto pōrutu. He nui te tūraru o te toto pōrutu mēnā ka momi tupeka te tangata, he mōmona ia, kāore ia e kori tinana, he nui rawa te tote me te ngako i tana whiringa kai, he nui hoki te pōkaikaha o te tangata. Ko tā te toto pōrutu he whakararu i te pana toto a te manawa huri amio i te tinana mā roto i ngā ia-tuku, me te hoki anō o ngā toto ki te manawa mā roto i ngā ia-auraki. He mate manawa pea, he roro ikura rānei te otinga atu.
Ko tētahi atu takenga o te toto pōrutu, ko te nui o te ngakototo i roto i te whiringa kai a te tangata. Mēnā he nui rawa te ngakototo, ka mārō haere, ka whāiti haere ngā ia-tuku, me te aha ka kaha kē atu te mahi a te manawa ki te papu toto. Mā konā e piki ai te pēhanga toto me te tūpono pā o te mate manawa.
Me he ngoikore te pēhanga toto, ka kīia tērā ko te toto pūroto. He nui te tūraru o te toto pūroto mēnā e mate tauraki ana te tangata, e mate huka ana rānei, kua roa ia e takoto māuiui ana i rō moenga, mēnā rānei e hapū ana te wahine.
Mēnā e pai ana te pēhanga toto o te tangata, ka kīia tērā ko te toto rōnaki.