pairuri

WhakamĀrama Āpitihanga

Koia nei ētahi kupu e hāngai ana ki te pairuri:

• Ko te hīopeope, arā, ko te horoi mārire, ko te āta huri, ko te morimori i te tangata whakahemohemo i runga i te ngākau mākoha.
• Ko te kaimohi pairuri. Koia ngā kaimahi katoa ka mohimohi i te tangata whakahemohemo, arā, ko te whānau tonu, ko ngā mātanga pairuri, ko ngā tapuhi me ērā atu o ngā tūngaio hauora. Ko te whāinga matua kia piki te kounga ora o te tūroro, kia mauri tau ia, kia mamae-kore anō hoki.
• Ko te ō matenga. He kai tēnei ka āta whakaritea mā te tangata whakahemohemo, he horotai, he kai e tino kakato ana ki a ia i ōna rā, he kai ka kumamatia e ia.
• Ko te manawa kiore, arā, ko te ngoikore haere o te hā, ko te hā whakamutunga rānei o te tangata whakahemohemo.
• Ko te ōhākī a te tangata whakahemohemo, koirā āna kupu whakamutunga. I ētahi wā, he tohutohu ki tōna whānau, ki ōna piki tūranga rānei.
• Ko te tautiaki tānga manawa. I konei ka tiakina te tangata māuiui i roto i tētahi puni whakaahuru, i wāhi āhuru kē atu rānei mō tētahi wā, hei whakatā, hei tānga manawa mō te whānau e mātua tiaki ana i a ia, e piki anō ai tō rātou kaha, tō rātou ngoi.
• Ko te mate tuamatangi. He mate tēnei e kore e taea te whakaora, ko te pahemo o te tangata te otinga atu, ka rongoātia te mamae, koirā noa iho. Ko te mate pukupuku maukaha, ko te korongenge hei tauira.