tūroro

WhakamĀrama Āpitihanga

Mēnā e tino māuiui ana te tūroro, e tino whara ana rānei, ka whakaurua ki rō hōhipera, ki reira āta mohimohitia ai. Mēnā ka noho ia ki reira mō tētahi wā, ka kīia ia he tūroro tauroto. Mēnā ka torotoro te tūroro ki te hōhipera kia rongoātia i ia rā, i ia wiki rānei, engari ka hokihoki atu ki tōna kāinga, ka kīia ia he tūroro tauwaho.

Mēnā he mate taihemo, he whara hārukiruki rānei, ko te wāhanga whāomoomo o te hōhipera te wāhi e mohimohitia ai ia. He tino pūkenga ō te tūngaio hauora o te taiwhanga whāomoomo, he pūrere motuhake anō ō reira hei taupua ora mō te tūroro, ā, ka āta aroturukihia ia i ngā wā katoa, kei mate.

I ngā tau o mua tata nei kua tino tahuri ngā kaiwhakarato hauora o Aotearoa ki te whakanoho i te tūroro ki te pokapū o ngā mahi, arā, kia whakautea tōna ahurea, tōna reo me āna tikanga, kia puata te whakawhiti kōrero ki a ia, tae atu ki te tuitui i ngā maimoatanga e tukuna ana e tēnā rata e tēnā, e tēnā kaiwhakarato e tēnā. Ka kīia tērā ko te tautiaki arotūroro.

Ko tētahi tikanga tūāpapa o roto i te pūnaha hauora o Aotearoa, ko te 'whakaae i runga i te mōhio' o te tūroro ki ngā momo maimoatanga, ki ngā rongoā ka tukua ki a ia. Arā, kia āta whākina ngā taha katoa o te maimoatanga, kia mārama pū ai te tūroro ka ahatia ia, he aha hoki ngā hua tērā ka puta.