WhakamĀrama Āpitihanga
He karihi kei te pokapū o te ngota. He iraoho, he iramoe kei roto i te karihi (hāunga te hauwai (H), kāore ōna iramoe). He irahiko e nukunuku āwhio ana i te karihi. He ōrite te maha o ngā irahiko me te maha o ngā iraoho o tētahi ngota, nō reira kāore he whana hiko o te ngota. Ka kīia he ngotangota te iraoho, te iramoe me te irahiko nā te mea he iti ake i te ngota.
He hoahoa tēnei o te ngota hauota (N):
Ko tā te tau iraoho, he whakaatu i te maha o ngā iraoho o tētahi ngota. Ko tā te tau karihi, he whakaatu i te maha o ngā iraoho me ngā iramoe. E pēnei ana te whakaatu i te tau iraoho me te tau karihi ki te Taka Pūmotu:
Noho mai ai ngā irahiko o tētahi ngota ki ētahi whaitua i waho atu i te karihi, ki roto i aua whaitua āwhio haere ai. E rua ngā irahiko ka taea ki roto i te whaitua irahiko tuatahi, e waru ka taea ki te whaitua irahiko tuarua, tekau mā waru ka taea ki te whaitua irahiko tuatoru. Ka taea ngā irahiko e noho tawhiti ana i te karihi te whakawhiti atu ki ngota kē e pātata ana, ka taea rānei te hono atu ki ētahi ngota e rua. Mā konei e hono tahi ai he ngota hei rāpoi ngota, hei pūhui matū rānei.