kapa hākinakina

WhakamĀrama Āpitihanga

Ko te whai wāhitanga ki te hākinakina te hiahia matua o ētahi kaitākaro, koia hoki te kaupapa o ētahi kapa hākinakina, o ētahi karapu hākinakina, arā, ko te taha whakawhanaunga tērā, ko te taha rēhia hoki.

Ko te whakataetae te whāinga a ētahi kapa hākinakina, arā, kia hinga i a rātou te hoariri. I reira ka whakatūria he mahere whakangungu, he mahere whakapakari, he taritari kaitākaro, otirā he rautaki whānui e angitu ai te kapa.

Koia nei ētahi tūranga o roto i tētahi kapa hākinakina:

• Ko te kaiwhakaako. He tautōhito, he mōhio ki ngā ture, māna e whakangungu, e whakarite ngā kaitākaro.
• Ko te kaiwhakahaere o te kapa. Māna e whakarite ngā āhuatanga pērā i ngā kahu tākaro, i ngā waka hei haere mā te kapa ki te wāhi tākaro, tae atu ki ngā mahi takawaenga ki ngā mātua me ngā whānau o ngā kaitākaro.
• Ko te kaiwhakapakari. Māna e tohutohu, māna e āwhina te kaitākaro kia pakari ake ai tōna tinana, kia pai ake ai ōna pūkenga tākaro.
• Ko te kaitaki. Māna e ārahi, e tohutohu, e whakahau te kapa i runga i te papa tākaro, māna e kōrero ki te kaiwawao, ko ia hoki hei māngai kōrero mō te kapa.
• Ko te kaitaki mātāmuri. Māna e āwhina te kaitaki, māna e kawe ngā mahi a te kaitaki mēnā kāore te kaitaki e tākaro ana.
• Ko te kaitākaro whakahiri. Kāore ia i roto i te aroākapa ka whakaeke i te papa tākaro i te tīmatanga o te kēmu. Ka noho ia ki te paetaha, ki te pae whakahiri rānei, ā, mēnā ka whara tētahi kaitākaro, ka unuhia rānei e te kaiwhakaako tētahi kaitākaro, mā te whakahiri e whakakapi.
• Ko te kaitākaro rakarau. He maha ōna pūkenga, ka taea e ia ētahi tūranga maha i roto i te kapa.
• I ētahi wā, ka whakaingoatia tētahi tino kaitākaro o roto i te kapa, ko ia te mea i tino eke tana tākaro i tētahi kēmu, i te roanga atu rānei o te kaupeka tākaro o te tau. He wā anō ka kīia te tino kaitākaro, ko te whetū o te rā.