WhakamĀrama Āpitihanga
Arā ētahi whakataetae, he huihuinga kaitākaro tokomaha, kapa tokomaha rānei. Kotahi rā, roa ake rānei ētahi o ēnei whakataetae, ko ētahi ka haere mō te roanga atu o te kaupeka tākaro, kātahi ka kitea ko wai ka toa.
He nahanaha ngā momo tātaitākaro mō ēnei whakataetae, ko te whāinga i konā, kia tōkeke te whakataetae mō ia kapa, mō ia kaitākaro rānei. E rua ngā momo tātaitākaro matua:
- Ko te whakataetae putarere. Ka whakarārangihia ngā kaitākaro, ngā kapa rānei, ā, ka tākaro te tuatahi me te tuarua, te tuatoru me te tuawhā, otirā ngā takirua katoa. Ko ngā mea ka hinga, ka puta rātou i te whakataetae matua, ā, i ētahi wā, ka whakaritea he whakataetae mātāmuri i waenga i ērā kaitākaro, i ērā kapa rānei. Ko ngā mea ka toa ka tākaro takirua anō, ā, ka puta ngā mea ka hinga. Ka pērā te haere o te whakataetae tae atu ki te whiringa toa, arā te takirua whakamutunga. Ko te mea ka hinga i te whiringa toa, ka kīia ko ia te tuarua. I ētahi whakataetae putarere he matapōkere te whakarārangi i ngā kaitākaro, i ngā kapa rānei. I ētahi ka raupapahia ngā kaiuru i runga i te āhua o tā rātou eke taumata o muri tata. Ka kīia tēnei ko te māhiti, ā, ko te take o te māhiti kia kore ai ngā tino kaiuru e pakanga i te whiringa tuatahi. Hei tauira māmā, tokowaru ngā kaitākaro i tēnei whakataetae putarere:
- Ko te whiringa whakapau. Ka tākaro ia kapa, ia kaitākaro rānei ki ērā atu o ngā kapa katoa, o ngā kaitākaro katoa. I te nuinga o te wā, e rua ngā whiwhinga mō te toa, kotahi te whiwhinga mēnā ka takarite ngā tapeke, karekau he whiwhinga mō te hinga. I te mutunga o te whakataetae ko te kaitākaro, ko te kapa kei a ia te tapeke nui, ko ia te toa. Mēnā he tino maha ngā kaiwhakataetae, ka wehea pea ki ētahi puna whakataetae e rua, nui ake rānei. Ko ngā toa o ia puna ka uru atu ki te whiringa toa. Hei tauira māmā, e ono ngā kaitākaro i tēnei tātaitākaro whiringa whakapau:
Mēnā he taukehe te maha o ngā kapa, o ngā kaitākaro rānei, ka tohua he whakanā mō tētahi kapa i ia whiringa o te whakataetae, arā, kāore taua kapa e tākaro i tērā whiringa.
I ētahi whakataetae, ka whakatūria he whiringa uru i mua i te whakataetae matua, koirā hei tohu i ētahi kapa, i ētahi kaitākaro rānei ka uru ki te whakataetae matua.