hui ōkawa

WhakamĀrama Āpitihanga

Koia nei ētahi o ngā kupu me ngā tikanga e hāngai ana ki te hui ōkawa:

• Ko te rārangi take. Koia hei whakaatu i ngā kaupapa ka kōrerohia i te hui, mai i te mea tuatahi ki runga, ki te kaupapa whakamutunga ki raro. Mutu ana ngā kōrero e pā ana ki ngā kaupapa i te rārangi take, ka huri ki ngā take whānui, arā, e wātea ana kia tāpaehia e tētahi o roto i te hui tētahi atu kaupapa hei kōrerotanga mā te hui.
• Ko te mōtini. He tāpaetanga ōkawa e tohu ana i tētahi mahi, i tētahi kaupapa rānei hei whaitanga mā te rōpū. E tika ana kia tautokohia te mōtini e tētahi, kātahi ka matapakihia te mōtini, ka pōtihia i te mutunga o ngā kōrero. Mā te pōti e whakatauria ai mēnā ka mana te mōtini, kāore rānei. I ētahi wā, ka tāpaehia he menemana, arā, he paku whakarerekētanga o te mōtini. Ka pōtihia hoki te menemana.
• Ko ngā whakapāha. I te tīmatanga o te hui ka pāhotia, ka tuhia ngā ingoa o ngā tāngata kāore i tae atu, engari i tuku kōrero mai mō tō rātou kore i wātea kia haere atu.
• Ko ngā meneti, arā, ko te hopunga o ngā kōrero i puta i te hui. I te hui ōkawa ka tirohia ngā meneti o te hui o mua, ā, ka kōrerohia ngā take ka ara ake i aua meneti rā, me te whakatika anō i ngā meneti mēnā e hē ana.
• Ko te heamana o te hui ōkawa, ko ia te kaiwhakahaere o te hui.
• Ko te ui tikanga. Koia ko te kōamuamu a tētahi kāore i tika te whakahaere o te hui, kāore rānei i hāngai ngā kōrero a tētahi.
• Ko te kōrama. Ko te mōkito o ngā tāngata e tika ana kia tae atu ki te hui i raro i te turepapa o te rōpū. Ki te kore e eke ki tērā tokomaha, kāore e tika ana kia haere tonu te hui.
• Ko te ki-rō-komiti. Koia ko te wāhanga o te hui e noho matatapu ana ngā kōrero, kāore e whai wāhitia atu e te marea.